BAKI,AzerVoice, Fərid Mikayılov
ABŞ Prezidenti Donald Tramp 13 yanvar, çərşənbə axşamı kütləvi etirazlar fonunda İrana hücum əmrini vermək niyyətində olub, lakin son anda bu qərarından imtina edib.
AzerVoice xəbər verir ki, bu barədə The Wall Street Journal (WSJ) məlumat yayıb.
Nəşr bildirir ki, Tramp axşam saatlarında əmri verməyə meylli olub və Pentaqona İran üzərinə hücuma hazırlıq göstərişini verib.
Lakin prezident məsləhətçilərinin arqumentləri onun fikrini dəyişməsinə səbəb olub. Məsləhətçilər yalnız sürətli hava zərbələri ilə İran rejimini devirmək barədə zəmanət verə bilməyəcəklərini qeyd ediblər.
Əvvəllər ABŞ prezidentinin xüsusi nümayəndəsi Stiv Vitkoff bildirmişdi ki, Vaşinqton ilə Tehran arasında siyasi böhranın həlli üzrə razılaşma dörd əsas sahəni əhatə etməlidir:
- Uranın zənginləşdirmə səviyyəsi
- Raket ehtiyatlarının azaldılması
- Toplanmış nüvə materialının idarə olunması
- Yaxın Şərqdə İran tərəfdarı qrupların fəaliyyətləri.