BAKI, AzerVoice
Türkiyə yüksək texnologiyalı ixracla qlobal ticarətdəki payını artırmağı hədəfləyir
AzerVoice xəbər verir ki, Türkiyə Vitse-prezidenti Cevdet Yılmaz aprel ayı üzrə xarici ticarət göstəricilərini dəyərləndirərək ölkənin qlobal ticarətdəki payını artırmağa yönəlmiş siyasətlərindən danışıb.
Vitse-prezident bildirib ki, aprel ayında ixrac ötən ilin eyni dövrü ilə müqayisədə 8,5 faiz artaraq illik ifadədə 265 milyard dolları keçib. Yanvar-aprel dövründə isə ixrac 3,9 faiz artım göstərib.
Yılmaz, xüsusilə yüksək texnologiyalı məhsul ixracının ümumi artımı üstələyərək 13,2 faiz yüksəldiyini qeyd edib. Müdafiə və aviasiya sektorunun bu artıma əhəmiyyətli töhfə verdiyini vurğulayan vitse-prezident, ilin ilk dörd ayında bu sahədə ixracın 67 faiz artaraq 2,4 milyard dollara çatdığını bildirib.
“Qlobal ticarət siyasətlərindəki qeyri-müəyyənliklərə baxmayaraq, yüksək əlavə dəyər, innovasiya və rəqabətə əsaslanan ixrac siyasətləri ilə Türkiyənin ixracını və qlobal ticarət payını artırmağı hədəfləyirik,” – deyə Yılmaz bildirib.
Qeyd edək ki, Türkiyə son illərdə yüksək texnologiyalı məhsulların ixracına yönəlmiş strateji yanaşmanı gücləndirərək, istehsalı və ixracı dəstəkləyən iqtisadi siyasətləri davam etdirməkdədir.
