BAKI, AzerVoice
HAVELSAN texnologiyaları TEKNOFEST KKTC-də böyük maraqla qarşılanır.
AzerVoice xəbər verir ki, Türkiyənin qabaqcıl texnologiya şirkəti HAVELSAN, Kiprdə keçirilən TEKNOFEST KKTC çərçivəsində paraşüt və atıcılıq simulyatorları da daxil olmaqla bir sıra interaktiv texnoloji təcrübələri ziyarətçilərə təqdim edir.
Dünyanın ən böyük aviasiya, kosmos və texnologiya festivalı – TEKNOFEST, bu il Şimali Kipr Türk Cümhuriyyətində keçirilir. Festival KKTC Prezidentliyinin himayəsi altında, Türk Texnologiya Komandası Vəqfi və Türkiyə Sənaye və Texnologiya Nazirliyinin təşkilatçılığı ilə, köhnə Ercan Hava Limanında reallaşır.
HAVELSAN stendində paraşüt və atıcılıq simulyatorları, süni intellekt seminarları və mühəndislik atelyeləri ilə gənclərə, uşaqlara və hətta yaşlılara texnologiya ilə tanış olmaq imkanı yaradılıb. Şirkətin baş direktoru Mehmet Akif Nacar Kiprdə olmaqdan məmnunluğunu ifadə edərək, “TEKNOFEST yalnız texnologiyanın deyil, həm də vətənə sədaqətin nümayiş olunduğu bir platformadır.” - deyə bildirib.
Nacar həmçinin Kiprdə sahil təhlükəsizliyi layihəsinin həyata keçirildiyini və bu sistemin dəniz qaçaqmalçılığı, tullantılar və digər risklərin qarşısını almağa xidmət etdiyini vurğulayıb. Bundan əlavə, HAVELSAN-ın KKTC Prezident Kompleksinin təhlükəsizlik sistemlərini, üz tanıma və avtomobil nişan oxuma texnologiyalarını təmin etdiyi bildirilib.
Kipr universitetlərində təhsil alan beynəlxalq tələbələrin potensialına diqqət çəkən Nacar, TEKNOFEST çərçivəsində bu insan resursunu texnologiya və sahibkarlıq sahələrinə yönəltmək istiqamətində danışıqların aparıldığını bildirib.
Qeyd edək ki, TEKNOFEST KKTC 4 may tarixinə qədər ziyarətçilərin ixtiyarında olacaq. Tədbirdə iştirak ödənişsizdir, lakin 7 yaşdan yuxarı şəxslər üçün qeydiyyat zəruridir. Ziyarətçilər festival ərazisinə hər gün saat 09:00-dan 19:00-a qədər daxil ola bilərlər.
