BAKI, AzerVoice

Türkiyənin ilk yerli kiçik sualtı qayığı Curiosus-2 Bodrumda nümayiş etdirilir.

AzerVoice xəbər verir ki, türk mühəndisliyinin önəmli nailiyyətlərindən biri olan Curiosus-2 sualtı qayığı Bodrum Dəniz Muzeyində sərgilənməyə başlanılıb.

1995-ci ildə mühəndis və ixtiraçı Erkan Ayral tərəfindən yerli texnologiya ilə inşa edilən bu qayıq Türkiyənin ilk yerli mülki kiçik sualtı vasitəsi kimi tarixə düşüb.

Curiosus-2 sualtı qayığı 400 metr dərinliyə qədər enə bilir və illər ərzində sualtı tədqiqatlar və axtarış-xilasetmə əməliyyatlarında istifadə olunub. Uzunluğu 4 metr 20 santimetr, çəkisi isə 3055 kiloqram olan bu texnoloji vasitə zəlzələ fay xətlərindən enerji boru kəmərlərinə qədər müxtəlif strateji sahələrdə xidmət göstərib. Xüsusi aparatı sayəsində sualtı xilasetmə əməliyyatlarında da uğurla tətbiq olunub.

Curiosus-2-nin muzeyə bağışlanması mühəndis Erkan Ayralın oğlu Alp Ayral tərəfindən həyata keçirilib. O, bu texnoloji mirası gələcək nəsillərə çatdırmaq istədiklərini bildirib.

Curiosus-2 Bodrum Dəniz Muzeyi ilə imzalanan protokol çərçivəsində şəhərin Təpəcik Meydanında sərgilənir. Muzeydə sualtı qayıqla yanaşı, gənc nəslin marağını cəlb edən sualtı robotlar da nümayiş etdirilir.

Bodrum Dəniz Muzeyinin direktoru Selen Cambazoğlu da bu təşəbbüsü yüksək qiymətləndirərək,

“Curiosus-2 təkcə Bodrum üçün deyil, Türkiyənin dənizçilik tarixində də önəmli dönüş nöqtəsidir. Bu layihə sübut edir ki, biz texnologiya və dənizçilik sahəsində öz gücümüzə güvənə bilərik” - deyə bildirib.