BAKI, AzerVoice
Səudiyyə Ərəbistanı, İsrail rəsmilərinin Əl-Əqsa məscidinə (Məscidül-Əqsa) basqın etməsini pisləyib.
AzerVoice xəbər verir ki, bu barədə Səudiyyə Ərəbistanının Xarici İşlər Nazirliyinin yaydığı bəyanatda deyilir.
Bəyanatda, beynəlxalq hüququn açıq-aşkar şəkildə pozulmasının davam etdirilməsi və məscidin hörmətinə qarşı həyata keçirilən qəddar hücumlar yenidən qınanıb. Riyad, Qüds və onun müqəddəs yerlərinin tarixi və hüquqi statusuna hər hansı müdaxilənin qətiyyətlə rədd edildiyi bildirilib.
Səudiyyə Ərəbistanı, beynəlxalq ictimaiyyəti, İsrail qüvvələrinin Fələstindəki müqəddəs İslam yerlərinə və günahsız mülki şəxslərə qarşı törətdiyi davamlı pozuntulara görə cavabdeh tutmağa çağırıb.
Qeyd edək ki, bazar ertəsi günü İsrailin milli təhlükəsizlik naziri İtamar Ben Qvir və qorumaları Əl-Əqsa məscidinə basqın etmiş, onun həyətlərində təxribat xarakterli dini ayinlər icra etmişdi.
Fələstin mətbuatının məlumatına görə, İsrail qüvvələri fələstinli ibadət edənlərin məscidə girişinə qarşı sərt məhdudiyyətlər qoyub və xüsusilə gənclərin girişinə mane olub.
