BAKI, AzerVoice
Səudiyyə Ərəbistanı, müstəqil Fələstin dövlətinin yaradılmasının bölgədə sülh və sabitlik üçün yeganə yol olduğunu bir daha vurğulayıb.
AzerVoice xəbər verir ki, bu mövqe, BMT-nin Nyu-Yorkdakı qərargahında, Səudiyyə Ərəbistanı ilə Fransanın birgə rəhbərliyi ilə keçirilən, Fələstin məsələsinin sülh yolu ilə həll olunması məqsədi daşıyan yüksək səviyyəli beynəlxalq konfransa hazırlıq toplantısında səsləndirilib.
Toplantıda Səudiyyə Ərəbistanının nümayəndə heyətinə Xarici İşlər Nazirliyinin müşaviri Manal Həsən Rıdvan, Fransa tərəfinə isə prezident müşaviri Ann Kler Loyandr rəhbərlik edib.
Manal Rıdvan açılış nitqində bildirib ki, Səudiyyə Ərəbistanı və Fransa bu konfransın bölgədə ədalətli və davamlı sülhə aparan tarixi dönüş nöqtəsi olmasını istəyir. O, Qəzzada işğalın sona çatmasının və Fələstin dövlətinin qurulmasının bölgədə təhlükəsizlik və sabitlik üçün yeganə yol olduğunu vurğulayıb.
O, həmçinin qeyd edib ki, müharibənin dayandırılması, girovların və əsirlərin azad edilməsi və hərtərəfli təhlükəsizliyin təmin olunması yalnız münaqişənin köklərini hədəfləyən etibarlı siyasi plan vasitəsilə mümkündür.
Manal Rıdvan, Fələstin rəhbərliyinin həyata keçirdiyi islahatları müsbət qiymətləndirib və beynəlxalq ictimaiyyətin yeni Fələstin hökumətinə dəstəyinin vacibliyini vurğulayıb. O, həmçinin Səudiyyə Ərəbistanının Ərəb Sülh Təşəbbüsünə sadiqliyini və Avropa İttifaqı (Aİ) və Norveç ilə birlikdə “İki Dövlətli Həllin Həyata Keçirilməsi üçün Qlobal Koalisiyanın” əsas təşəbbüskarlarından biri olduğunu bir daha xatırladıb.
Toplantıda konfrans çərçivəsində formalaşdırılmış 8 işçi qrupuna rəhbərlik edən 19 ölkə və beynəlxalq təşkilat öz hesabatlarını təqdim edib. BMT-nin Siyasi və Sülh Quruculuğu məsələləri üzrə baş katib müavini Rozmari DiKarlo da tədbirdə iştirak edib.
Toplantıda iştirak edən dövlətlər, Səudiyyə Ərəbistanı və Fransanın təşəbbüsünü və işçi qrupların fəaliyyətini yüksək qiymətləndirərək, iyunun 17-dən 20-dək keçirilməsi planlaşdırılan beynəlxalq konfransın uğurla baş tutması üçün konkret təklif və təşəbbüslərlə iştirak edəcəklərini bildiriblər.