BAKI, AzerVoice, Nailə Babazadə

Venesuelanın müvəqqəti dövlət başçısı Delsi Rodriqes ölkənin neft sənayesinə daha çox xarici investisiyanın cəlb edilməsini nəzərdə tutan islahatların qəbulu üçün parlamentə müraciət edib.

AzerVoice xəbər verir ki, ABŞ-ın Venesuelaya qarşı həyata keçirdiyi 3 yanvar hücumundan sonra ilk dəfə xalqa müraciət edən Rodriqes ölkənin neft ehtiyatları ilə bağlı yeni vizyonunu təqdim edib. O, xarici şirkətlərin ölkənin enerji resurslarına çıxışını təmin edəcək hüquqi islahatların vacibliyini vurğulayıb. Rodriqes bildirib ki, Venesuela enerji sektorundan əldə etdiyi məhsulları dünya bazarlarında sərbəst ticarət əlaqələri çərçivəsində sata bilər.

Müvəqqəti dövlət başçısı neft satışından əldə olunacaq gəlirlərin səhiyyə və dövlət infrastrukturunun gücləndirilməsi məqsədilə yaradılan iki xüsusi dövlət fonduna yönəldiləcəyini açıqlayıb. O, ölkədəki xarici diplomatları bu dəyişiklikləri beynəlxalq investorlara çatdırmağa çağırıb. Xatırladaq ki, ABŞ-ın hava hücumları zamanı dövlət başçısı Nikolas Maduro və həyat yoldaşı Cilia Floresin saxlanılmasından sonra Delsi Rodriqes yanvarın 5-də parlamentdə and içərək müvəqqəti olaraq dövlət başçısı vəzifəsinin icrasına başlayıb.