BAKI,AzerVoice, Nailə Babazadə

İsveçrə Federal şurası, ABŞ tərəfindən həbsdə saxlanılan Venezuela Prezidenti Nikolas Maduro və onunla əlaqəli şəxslərin İsveçrə ərazisindəki bütün mal-mülkünü dondurma qərarı alıb.

AzerVoice xəbər verir ki, İsveçrə hökuməti mövzuya dair yazılı açıqlama yayıb.

"Federal şurası, Venezuela Prezidenti Maduro və onunla əlaqəli digər şəxslərin İsveçrədəki bütün varlıqlarını dərhal dondurmaq qərarı alıb." - deyə açıqlamada qeyd olunub.

Bəyanatda izah olunur ki, bu qərar aktivlərin xaricə çıxmasının qarşısını almağı hədəfləyir və hazırkı Venesuela hökumətinin üzvlərinə təsir etmir.

Açıqlamanın davamında, "Gələcəkdəki hüquqi proseslər, fondların qanunsuz yollarla əldə edildiyini ortaya qoyarsa, İsveçrə bu vəsaitlərin Venesuela xalqına fayda gətirməsini təmin etməyə çalışacaq. Varlıq dondurma qərarı, 2018-ci ildən etibarən Ambargo Qanunu çərçivəsində Venesuelaya qarşı tətbiq olunan sanksiyalara əlavə olaraq qəbul edilib," ifadəsi yer alıb.

Xatırladaq ki, Venesuelanın paytaxtı Karakasda 3 yanvarda yerli vaxtla təxminən saat 02:00-da partlayış və təyyarə səsləri eşidilmişdi. Hadisədən sonra Venesuela hakimiyyəti ABŞ-ı ölkənin müxtəlif bölgələrində mülki və hərbi obyektlərə hücum etməkdə ittiham edib.

ABŞ Prezidenti Donald Tramp Venesuela Prezidenti Nikolas Maduroya qarşı genişmiqyaslı hücum həyata keçirildiyini, Maduronun və həyat yoldaşının ölkə xaricinə çıxarıldığını açıqlamışdı.

ABŞ-ın ədliyyə naziri Pam Bondi isə Nikolas Maduro və həyat yoldaşı Siliya Flores barəsində ABŞ-da cinayət işi qaldırıldığını, Maduronun “narkotik terrorizmi, kokain qaçaqmalçılığı, ABŞ-a qarşı avtomatik silah və dağıdıcı qurğulara sahib olmaq” ittihamları ilə üzləşdiyini bildirmişdi.

Venesuela rəhbərliyi ABŞ-ın hərəkətlərinin beynəlxalq ictimaiyyət tərəfindən pislənməsi üçün çağırış edib. Bəzi ölkələr hücumu tənqid edərkən, digərləri açıqlamaları ilə ABŞ-a dəstək verdiklərini bəyan ediblər.