BAKI, AzerVoice, Nailə Babazadə

Fransanın Baş naziri Sebastien Lekornu hökumətin süqutu halında erkən ümumi seçkilər ehtimalına hazırlıq görülməsi üçün Daxili İşlər naziri Loran Nunezə tapşırıq verib.

AzerVoice xəbər verir ki, Fransada 15–22 mart tarixlərində keçiriləcək bələdiyyə seçkiləri ilə eyni vaxtda erkən ümumi seçkilərin də təşkil olunması ehtimalı yaranıb.

İctimai yayımçı Franceinfonun məlumatına görə, hakimiyyət düşərgəsindən adının açıqlanmasını istəməyən mənbə Lekornunun Nunezə bələdiyyə seçkiləri ilə eyni tarixdə mümkün ümumi seçkilərə hazırlıq görülməsi barədə göstəriş verdiyini bildirib.

Həmin mənbə müxalifətin təqdim etdiyi etimadsızlıq təklifləri səbəbindən hökumətin devriləcəyi təqdirdə Milli Assambleyanın buraxılacağını qeyd edib.

Müxalifət düşərgəsindən “Boyun Əyməyən Fransa” (LFI) partiyası və “Milli Birlik” (RN) partiyası Lekornu hökumətinə qarşı Milli Assambleyaya etimadsızlıq təklifi təqdim etmişdi.

Sözügedən etimadsızlıq təkliflərinin gələn həftə parlamentin plenar iclasında səsverməyə çıxarılması gözlənilir.

LFI qrup sədrinin müavini Matild Pano dünən Fransanın beynəlxalq arenada nüfuzdan salındığını və Lekornu ilə Fransa Prezidenti Emmanuel Makronun vəzifələrindən getməli olduqlarını bildirib.

Son illərdə Fransada hökumət qeyri-sabitliyi yaşanır. Keçmiş Baş nazir Mişel Barnyenin hökuməti 4 dekabr 2024-cü ildə, keçmiş Baş nazir Fransua Bayrunun hökuməti isə 8 sentyabr 2025-ci ildə süqut etmişdi.