BAKI, AzerVoice, Nailə Babazadə
Şimali Kipr Türk Cümhuriyyəti (ŞKTC) Xarici İşlər Nazirliyi tərəfindən Cənubi Kipr Rum Administrasiyasının (CKRA) Avropa İttifaqı (Aİ) Şurasına dövr sədrliyi ilə bağlı yayımlanan açıqlamada bildirilib ki, Aİ rəsmilərinin Kipr türk xalqını görməzdən gələn qərəzli mövqeyi davam etdikcə, onların xalq arasında etibar qazanması mümkün deyil.
AzerVoice xəbər verir ki, Türk Ajansı Kıbrıs (TAK) agentliyinin məlumatına görə, ŞKTC Xarici İşlər Nazirliyi CKRA-nın Aİ Şurasına dövr sədrliyi ilə bağlı mövqeyinə dair açıqlama yayıb.
Açıqlamada vurğulanıb ki, CKRA-nın Aİ Şurasının dövr sədrliyini üzərinə götürməsi ilə sərgilədiyi yanaşma Aİ-nin Kipr məsələsində illərdir davam etdirdiyi təhrif olunmuş və tərəfli siyasətin yeni təzahürüdür.
Bəyanatda qeyd olunub ki, Kipr türk xalqının sistemli şəkildə görməzdən gəlinməsi yalnız siyasi ədalətsizlik deyil, eyni zamanda Aİ-nin iddia etdiyi əsas dəyərlərlə açıq ziddiyyət təşkil edir.
Açıqlamada xatırladılıb ki, 1960-cı ildə Kipr türkləri və Kipr rumlarının bərabər tərəfdaşlığı əsasında qurulan Kipr Respublikası 1963-cü ilin dekabrında rumların silahlı hücumları nəticəsində legitimliyini itirmiş, konstitusion quruluş dağıdılmışdır.
Bildirilib ki, həmin tarixdən sonra haqsız və qanunsuz şəkildə “Kipr Respublikası” kimi təqdim edilən qurum əslində yalnız rumlara məxsus bir dövlətə çevrilmişdir. Bu vəziyyətdə Aİ öz dəyərlərinə və hüquqi normalarına zidd olaraq 2004-cü ildə bu rum dövlətini üzvlüyə qəbul etmiş və Kipr məsələsində tərəf mövqeyi tutmuşdur. Açıqlamada qeyd edilib ki, Aİ bu səhvini düzəltmək əvəzinə, zamanla CKRA-nın Birlik daxilindəki mövqeyini möhkəmləndirməsinə şərait yaradıb.
Bəyanatda vurğulanıb ki, Kipr türk tərəfi keçmişdə dəfələrlə xoş niyyətini və razılaşma iradəsini nümayiş etdirib, lakin Kipr türk xalqının suveren bərabərliyi və bərabər beynəlxalq statusu müzakirə mövzusu deyil, istənilən həllin ayrılmaz və əsas şərtidir.
Açıqlamada həmçinin qeyd olunub ki, adada və Şərqi Aralıq dənizi bölgəsində davamlı sülh və sabitliyin təmin edilməsi üçün Aİ iyirmi il əvvəl yol verdiyi səhvin məsuliyyətini üzərinə götürməlidir.
Sonda bildirilib ki, Aİ rəsmiləri tarixi və mövcud reallıqlardan uzaq bəyanatlar verməyə, Kipr türk xalqını görməzdən gələn və Kipr məsələsində maksimalist rum tezislərini müdafiə edən qərəzli mövqeyi davam etdirdikcə, Aİ-nin Kipr türk xalqı arasında etibar qazanması mümkün olmayacaq.