BAKI,AzerVoice, Nailə Babazadə

Avropa İttifaqı (Aİ) Komissiyasının sədri Ursula von der Leyen, Aİ Şurasının sədri Antonio Costa ilə birlikdə Suriyanın paytaxtı Dəməşq şəhərinə etdikləri ilk səfər zamanı ölkənin yenidən qurulması və bərpa prosesi çərçivəsində Suriyaya dəstək verəcəkləri mesajını verib.

AzerVoice xəbər verir ki, Von der Leyen və Costa Şamda Suriya Prezidenti Əhməd əş-Şaraa ilə görüşdən sonra açıqlama ilə çıxış ediblər.

Ursula von der Leyen ABŞ mərkəzli X şirkətinə məxsus sosial media platformasında etdiyi paylaşımda bildirib.

“Onilliklər boyu davam edən qorxu və səssizlikdən sonra suriyalılar ümid və yenilənməyə doğru uzun bir yola çıxıblar. Avropa Suriyanın toparlanması və yenidən qurulması üçün əlindən gələni edəcək.” - deyə o qeyd edib.

Antonio Costa isə açıqlamasında qeyd edib ki, “Uzun illər davam edən müharibə və əzabdan sonra (Bəşşar) Əsəd rejiminin süqutu nəhayət Suriya xalqı üçün bir ümid işığı olub. Aİ-nin Suriyaya davamlı dəstəyini nümayiş etdirmək üçün bu gün buradayıq. Qarşıda hələ uzun yol var, lakin siz artıq ilk addımları atmısınız.”

Qeyd edək ki, bu təmas 2024-cü ilin dekabrında Əsəd rejiminin devrilməsindən sonra Aİ-dən Suriyaya həyata keçirilən ən yüksək səviyyəli səfər olub.

Aİ 20 may 2025-ci ildə Suriyaya qarşı tətbiq olunan sanksiyaları ləğv etmişdi.

Aİ Komissiyasının Aralıq dənizi məsələləri üzrə üzvü Dubravka Suica isə 2025-ci ilin iyun ayında Suriyaya səfər edərək ölkənin yeni rəhbərliyi ilə görüşmüş və Aİ-nin Suriyanın sabit və firavan bir dövlətə çevrilməsinə dəstəyini çatdırmışdı.