BAKI, AzerVoice, Nailə Babazadə
Fələstinli Jurnalistlər Birliyi bildirib ki, İsrail qüvvələri dekabr ayında fələstinli jurnalistlərə qarşı öldürmə, yaralama, saxlanılma, hücum və xəbər izləməsinin əngəllənməsini əhatə edən 99 pozuntu həyata keçirib.
AzerVoice xəbər verir ki, birliyin “Mətbuat azadlığının reallığı” adlı aylıq hesabatında qeyd olunub ki, bu dövrdə İsrail qüvvələri fələstinli jurnalistləri sistemli şəkildə hədəfə alıb, təzyiq və məhdudiyyətlər yüksək səviyyədə davam edib.
İsrail qüvvələrinin həyat və təhlükəsizliyə yönəlmiş ağır pozuntuları çərçivəsində Qəzza zolağında vəzifəsini yerinə yetirərkən bir jurnalistin həlak olduğu, birbaşa hədəfə alma və bombardman nəticəsində iki jurnalistin yaralandığı, həmçinin iki jurnalistin yaxınlarının həyatını itirdiyi bildirilib.
İşğal altındakı Qərb Sahilində 48 saxlanılma və xəbər izləməsinin əngəllənməsi halı qeydə alınıb, xəbər zamanı qaz və səs bombaları ilə 15 hücum, iki qəsdən nəqliyyat vasitəsi ilə əzmə cəhdi, 9 silahlı təhdid və 6 şifahi təhdid sənədləşdirilib.
Bu tətbiqlərin Qəzza ilə yanaşı Qüds, əl-Xəlil, Cenin və Ramallahda da görüntü və həqiqətin ötürülməsini əngəlləməyə yönəlmiş sistemli siyasətə işarə etdiyi vurğulanıb.
Fiziki hücumlar nəticəsində iki jurnalistin döyüldüyü, bir mətbuat avadanlığının sıradan çıxarıldığı və İsrail bombardmanı nəticəsində iki jurnalistin evinin dağıdıldığı bildirilib.
Bundan əlavə, iki həbs, iki təhlükəsizlik araşdırması, eləcə də İsrail media orqanları vasitəsilə jurnalistlərin “silahlı təşkilatlarla əlaqəli olduğu” iddiası ilə aparılan iki təşkilatlanmış qaralama kampaniyası da hesabatda yer alıb.
Hesabatda İsrailli məskunlaşanların bir jurnalistə qarşı hücumu ordunun himayəsi altında həyata keçirdiyinə diqqət çəkilərək, bunun cəzasızlıq mühitində ordu ilə məskunlaşanlar arasında rol bölgüsünün davam etdiyini göstərdiyi qeyd edilib.
Digər tərəfdən, Qəzzadakı Hökumət Media Ofisi dekabrın əvvəlində yaydığı açıqlamada 8 oktyabr 2023-cü ildə başlayan və 2025-ci ilin oktyabrında qüvvəyə minən atəşkəslə başa çatan hücumlar müddətində 257 fələstinli jurnalistin həyatını itirdiyini bildirmişdi.
Bu hücumlar nəticəsində Qəzzada 71 mindən çox fələstinli həlak olub, təxminən 171 min nəfər yaralanıb. Qərb Sahili və Şərqi Qüdsdə isə İsrail ordusu və Fələstin torpaqlarını zəbt edən israillilərin hücumlarında ən azı 1105 fələstinli öldürülüb, təxminən 11 min nəfər yaralanıb, 21 mindən çox insan saxlanılıb.