BAKI,AzerVoice, Fərid Mikayılov

İsrail və ABŞ arasında “Pax Silica” təşəbbüsü çərçivəsində süni intellekt və kritik texnologiyalar sahəsində strateji əməkdaşlıq başlanıb.

AzerVoice xəbər verir ki, İsrail Baş nazirlik ofisinin açıqlamasına görə, əməkdaşlıq süni intellekt, yüksək informasiya infrastruktur, enerji texnologiyaları, kosmik texnologiyalar, yarımkeçirici materiallar və yeni nəsil istehsal texnologiyaları kimi sahələrdə birgə tədqiqat, investisiya və ticariləşdirmə fəaliyyətlərini əhatə edəcək.

Ortaqlığın məqsədi həmçinin həssas texnologiyaların və tədarük zəncirlərinin qorunmasıdır və bununla təhlükəsiz və davamlı investisiya mühiti yaradılması hədəflənir.

Ortaqlığın elan edildiyi tədbir İsrailin işğal altındakı Şərqi Qüdsdə, Silvan bələdiyyəsində keçirilib. Tədbirdə İsrail Xarici İşlər naziri Gideon Saar və ABŞ səfiri Mike Huckabee iştirak edib.

Saar çıxışında İsrailin ABŞ üçün əsas müttəfiq olduğunu vurğulayaraq, əməkdaşlığın həm təhlükəsizliyi, həm də bölgədə sabitliyi gücləndirdiyini bildirib.

ABŞ səfiri Huckabee isə iki ölkə arasındakı əməkdaşlığın kritik minerallara çıxış, tədarük zəncirlərinin dayanıqlılığı, süni intellekt, kvant hesablama və yeni nəsil texnologiyaların inkişafı kimi sahələri əhatə etdiyini qeyd edib.

Qeyd edək ki, “Pax Silica” təşəbbüsü ABŞ tərəfindən 12 dekabrda elan edilmiş və kritik minerallar, enerji və süni intellekt infrastrukturu kimi sahələri əhatə edən “silikon tədarük zənciri” yaratmağı hədəfləyir. Təşəbbüsdə Yaponiya, İsrail, Avstraliya, Sinqapur, Hollandiya, İngiltərə, Cənubi Koreya və BƏƏ də iştirak edir.