BAKI, AzerVoice, Nailə Babazadə

İranda iqtisadi böhran fonunda genişlənən etiraz aksiyaları səbəbindən Almaniya, İtaliya, İspaniya, Portuqaliya və Polonya daxil olmaqla bir çox Avropa İttifaqı (Aİ) ölkəsi vətəndaşlarına təcili xəbərdarlıq edib.

AzerVoice xəbər verir ki, ölkələrin xarici işlər nazirlikləri yanvarın 8-dən etibarən Tehranda şiddətlənən hadisələri nəzərə alaraq vətəndaşlarını mövcud imkanlarla İranı tərk etməyə və bu ölkəyə səfərlərdən çəkinməyə çağırıb. İspaniyanın xarici işlər naziri Jose Manuel Albares bölgədəki vəziyyəti "çox mürəkkəb" adlandıraraq birtərəfli xarici müdaxilənin İrana sabitlik gətirməyəcəyini və ölkənin dinc yolla demokratik gələcəyə addımlamasının vacibliyini vurğulayıb.

Xəbərdarlıqlar çərçivəsində Portuqaliya Tehrandakı səfirliyini bağladığını, Fransa isə hətta ikili vətəndaşlığı olan şəxslər və jurnalistlər üçün də həbs riskinin yüksək olduğunu bəyan edib. İranda 2025-ci il dekabrın 28-də yerli valyutanın kəskin dəyər itirməsi ilə başlayan etirazlar ölkə daxilində geniş miqyas alıb və yanvarın 8-də Tehranda baş verən toqquşmalardan sonra internetə çıxış məhdudlaşdırılıb.

İran rəsmi qurumları hələlik can itkiləri barədə məlumat verməsə də, insan haqları təşkilatları (HRANA) nümayişlər zamanı 2 min 615 nəfərin həyatını itirdiyini və 18 mindən çox insanın saxlanıldığını iddia edir. Aİ ölkələri bölgədəki qeyri-sabitliyin və təhlükəsizlik risklərinin artmaqda davam etdiyini bildirirlər.