BAKI,AzerVoice, Fərid Mikayılov

İran ABŞ Prezidenti Donald Trampın mümkün hərbi müdaxilə ilə bağlı açıqlamaları fonunda əksər uçuşlar üçün bağladığı hava məkanını yenidən açıb.

AzerVoice xəbər verir ki, ABŞ Federal Aviasiya Administrasiyasının (FAA) yaydığı bildirişlərə əsasən, İran hava məkanı cümə axşamı əksər kommersiya reysləri üçün müvəqqəti olaraq bağlanıb.

Məhdudiyyətlər İran Mülki Aviasiya Təşkilatının (CAO) əvvəlcədən verdiyi xüsusi icazə olmadan həyata keçirilən bütün uçuşlara şamil olunub.

FlightRadar24 uçuş izləmə xidmətinin məlumatına görə, İran üzərində cəmi üç təyyarə qeydə alınıb, onlarla reys isə ölkə sərhədləri ətrafından yönləndirilib. İran hava məkanı tam şəkildə bərpa olunub.

Məhdudiyyətlər ABŞ Prezidenti Donald Trampın İranda hökumət əleyhinə etirazların zorakılıqla yatırılmasından sonra Tehrana qarşı hərbi tədbirlərin mümkünlüyü ilə bağlı açıqlamaları fonunda tətbiq olunub. ABŞ və Böyük Britaniya da bu çərçivədə Qətərdə yerləşən Əl-Udeyd hərbi bazasından bəzi hərbi personalını geri çəkib. Daha əvvəl İran rəsmiləri ABŞ-nin hücumu halında regiondakı ABŞ qüvvələrinin hədəfə alınacağını bildirmişdi.

Bir sıra ölkələr də regionda gərginliyin artması ehtimalı ilə bağlı vətəndaşlarına təhlükəsizlik xəbərdarlıqları yayıb.

Aviasiya təhlükəsizliyi üzrə OpsGroup təşkilatının idarə etdiyi “Safe Airspace” platforması hava məkanının bağlanmasını mümkün hərbi və ya təhlükəsizlik fəaliyyətinin göstəricisi kimi qiymətləndirib və raket buraxılışları, gücləndirilmiş hava hücumundan müdafiə sistemləri fonunda mülki təyyarələrin səhvən hədəf alınması riskinə diqqət çəkib.