BAKI,AzerVoice, Fərid Mikayılov

İranda iqtisadi problemlərə etiraz olaraq başlayan aksiyalar fonunda 8 yanvar tarixində baş verən zorakılıq hadisələrindən sonra tətbiq edilən internet və rabitə məhdudiyyətlərinin mərhələli şəkildə ləğv olunacağı bildirilib.

AzerVoice xəbər verir ki, son günlərdə yaşanan təhlükəsizlik problemlərinin nəzarət altına alınması və terror təşkilatlarının əsas fiqurlarının təhlükəsizlik qüvvələri tərəfindən saxlanılmasından sonra kommunikasiya məhdudiyyətlərinin aradan qaldırılmasına başlanılıb.

Rəsmilər qeyd ediblər ki, internetə tətbiq edilən məhdudiyyətlər xaricdəki müxalif şəbəkələrin ölkə daxilindəki əlaqələrini ciddi şəkildə zəiflədib. Bu isə hadisələrin nəzarət altına alınmasında və terror hüceyrələrinin mümkün fəaliyyətlərinin qarşısının alınmasında mühüm rol oynayıb.

Məlumata görə, aidiyyəti qurumlar tərəfindən hazırlanmış plana əsasən, rabitə xidmətləri təhlükəsizlik vəziyyətindən asılı olaraq üç mərhələdə bərpa olunacaq. İlk mərhələdə qısa mesaj (SMS) xidmətləri yenidən aktivləşdirilib. İkinci mərhələdə milli internet şəbəkəsinə və yerli mesajlaşma tətbiqlərinə tam girişin təmin ediləcəyi, üçüncü mərhələdə isə beynəlxalq internetə çıxışın bərpa olunacağı bildirilib.