BAKI, AzerVoice, Orxan Qədirzadə

Livan ordusu ölkənin ən təhlükəli cinayətkarlarından biri hesab olunan və Bekaa vadisindəki narkotik şəbəkələrinə rəhbərlik etdiyi iddia olunan Nuh Zəytərin əməliyyat nəticəsində həbs edildiyini açıqlayıb.

AzerVoice xəbər verir ki, ordudan verilən məlumata görə, Zəytər cümə axşamı Kneisse–Baalbək yolu üzərində qurulan pusqu zamanı ələ keçirilib. O, narkotik ticarəti, xüsusilə kaptaqon istehsalı və qaçaqmalçılığı ilə əlaqədə ittiham olunur.

Zəytər illərlə təhlükəsizlik qüvvələrindən yayınırdı. 2014-cü ildə təhlükəsizlik qüvvələri ilə qarşıdurma zamanı yaralanaraq aparıldığı xəstəxanadan qaçmış, 2021-ci ildə isə hərbi məhkəmə tərəfindən qiyabi olaraq ömürlük həbs cəzasına məhkum edilmişdi. O, həmçinin İnterpol tərəfindən axtarışda idi.

ABŞ və Avropa rəsmiləri Zəytərin kaptaqon şəbəkəsinin Hizbullah və Suriya rejiminin keçmiş strukturları ilə əlaqəli olduğunu bildirir. O isə iddiaları rədd edir və siyasi motivli "uydurma" adlandırır.

Zəytərin vəkili Əşrəf Musəvi bildirib ki, Zəytər müxtəlif orderlərlə axtarılır və çoxu ömürlük cəza nəzərdə tutur.

“O, narkotik əkini və ticarəti ilə bağlı məsuliyyət daşıyır, lakin orduya qarşı silahlı müqavimət göstərməyib.”-o, deyib.

Ordunun məlumatına görə, Zəytər əməliyyat zamanı müqavimət göstərmədən təslim olub.

Zəytər eyni adlı klanın üzvüdür və ailə bölgədə silahlı qarşıdurmalar, silah qaçaqmalçılığı və narkotik ticarəti ilə tanınır. Yerli mənbələr onu Bekaa bölgəsində "mafiya bosu"na bənzədir və yüzlərlə ailənin dolanışığının onun şəbəkəsindən asılı olduğunu bildirir.

Mütəxəssislərin fikrincə, Zəytərin gücü qəbilə ittifaqları, korrupsiya və xüsusilə Hizbullahın siyasi himayəsi ilə formalaşıb.

Həbslə nəticələnən əməliyyat, ordunun Baalbəkdə Cəfər klanının silahlı qrupları ilə toqquşmasından cəmi 48 saat sonra baş tutub. Qarşıdurma zamanı iki hərbçi həlak olub, bir neçə nəfər yaralanıb, axtarışda olan Hüseyn Abbas Cəfər öldürülüb.