BAKI, AzerVoice, Nailə Babazadə
Birləşmiş Millətlər Təşkilatının Livandakı Müvəqqəti Sülhməramlı Qüvvələri (UNIFIL) Livanın cənubunda patrul xidməti həyata keçirən sülhməramlıların yerləşdiyi mövqelərin yaxınlığına iki dəfə atəş açıldığını açıqlayıb. UNIFIL hücumun mənbəyinin ehtimal ki, İsrail ordusu olduğunu bildirib.
AzerVoice xəbər verir ki, UNIFIL mövzu ilə bağlı ABŞ mərkəzli “X” sosial media platforması üzərindən yazılı açıqlama yayıb. Açıqlamada qeyd olunub ki, bu gün Livanın cənubundakı Nəbatiyyə vilayətinin Kəfər Şuba qəsəbəsində rutin patrul xidməti yerinə yetirən sülhməramlıların təxminən 50 metr yaxınlığına yüngül silahlardan atəş açılıb.
Hadisədən təxminən 20 dəqiqə sonra isə eyni ərazidə xidmət aparan digər UNIFIL patrulunun da təxminən 50 metr yaxınlığına bu dəfə pulemyotlardan atəş açıldığı bildirilib. Hər iki insident zamanı sülhməramlıların xəsarət almadığı vurğulanıb.
Açıqlamada hücumların mənbəyinin böyük ehtimalla sərhəd xəttinin cənubunda yerləşən İsrail ordusuna məxsus mövqedən həyata keçirildiyi qeyd olunub. Eyni zamanda UNIFIL-in mövcud prosedurlara uyğun olaraq bölgədəki fəaliyyətləri barədə İsrail ordusunu əvvəlcədən məlumatlandırdığı bildirilib.
UNIFIL son dövrlərdə bu cür hadisələrin artmasının narahatlıq doğurduğunu qeyd edərək, sülhməramlılara qarşı və ya onların yaxınlığında baş verən hücumların BMT Təhlükəsizlik Şurasının 1701 saylı qətnaməsinin “ciddi şəkildə pozulması” olduğunu vurğulayıb. Qurum İsraili sülhməramlılara qarşı hücumları və aqressiv davranışları dayandırmağa çağırıb.
Qeyd edək ki, İsrail ordusu ötən ilin noyabr və dekabr aylarında da UNIFIL qüvvələrini tank atəşi ilə hədəf almışdı.
Xatırladaq ki, Livanda vətəndaş müharibəsinin başlamasından sonra İsrail 1978-ci ildə Livan ərazisinə daxil olaraq Cənubi Livanı işğal edib. Həmin il BMT Təhlükəsizlik Şurası İsraili qüvvələrini Livandan çıxarmağa çağırıb.
BMT Təhlükəsizlik Şurası Livanın müraciəti əsasında 19 mart 1978-ci ildə UNIFIL-i yaradaraq İsrail qüvvələrinin geri çəkilməsinə nəzarət etmək, bölgədə sülh və təhlükəsizliyi bərpa etmək və Livan hökumətinin ölkənin cənubunda suverenliyini yenidən təmin etməsinə dəstək verməyi qarşıya məqsəd qoyub.
BMT TŞ 11 avqust 2006-cı ildə Livanla İsrail arasında 12 iyulda başlayan müharibəyə son qoyulmasını nəzərdə tutan 1701 saylı qətnaməni yekdilliklə qəbul edib. Sözügedən qətnamə İsrailin Mavi Xəttin arxasına çəkilməsini, Mavi Xətt ilə Livandakı Litani çayı arasındakı bölgənin silahsızlaşdırılmasını və bu ərazidə yalnız Livan ordusu ilə UNIFIL-ə məxsus silah və hərbi texnikanın yerləşdirilməsini nəzərdə tutur.