BAKI, AzerVoice, Nailə Babazadə

Livan Prezidenti Cozef Aun ilə Hizbullah hərəkatı arasındakı münasibətlər kəskin şəkildə pisləşib və tərəflər arasında təmaslar "minimum səviyyəyə" enib.

AzerVoice xəbər verir ki, gərginliyin əsas səbəbi Prezident Aunun Hizbullahın silahları ilə bağlı verdiyi son bəyanatlardır. Cozef Aun televiziya müsahibəsində dövlət nəzarətindən kənarda qalan silahların rolunun ordunun mövcudluğu ilə başa çatdığını bildirib. O qeyd edib ki, bu silahlar artıq nəinki çəkindirici rol oynamır, əksinə, həm Livan, həm də Hizbullahın öz bazası üçün ağır yükə çevrilib.

Hizbullah tərəfi bu açıqlamalara sərt reaksiya verərək prezidenti müqavimət güclərinin Livanın azad edilməsindəki rolunu görməməzlikdən gəlməkdə ittiham edib. Qruplaşmanın rəsmiləri bildiriblər ki, bu mövqe reallığı əks etdirmir və alternativ təhlükəsizlik zəmanətləri təqdim edilmədən silahların təhvil verilməsi qəbulolunmazdır. Mütəxəssislər hesab edirlər ki, Hizbullahın hərbi itkiləri və bölgədəki "Müqavimət Oxu"nun geriləməsi qruplaşmanı daha radikal ritorikaya sövq edir.

Məlumata görə, Hizbullah həmçinin Baş nazir Nəvaf Salam hökuməti ilə də ciddi fikir ayrılıqları yaşayır. Xüsusilə İsrail ilə aparılan danışıqlarda dövlətin tutduğu mövqe Hizbullah tərəfindən "zəmanətsiz güzəşt" kimi qiymətləndirilir. Bununla belə, siyasi təhlilçilər Hizbullahın həm prezident, həm də baş nazirlə əlaqələri tamamilə kəsməkdə maraqlı olmadığını, çünki mövcud siyasi təmasların qruplaşmanın cənubdakı maraqlarını qorumaq üçün yeganə çıxış yolu olduğunu bildirirlər.