BAKI, AzerVoice, Fərid Mikayılov

İran və Rusiya dəyəri 25 milyard dollar olan və dörd yeni nüvə elektrik stansiyasının tikintisini nəzərdə tutan müqavilə imzalayıb.

AzerVoice xəbər verir ki, sazişə əsasən, Hörmüzqan vilayətinin Sirik bölgəsində yerləşəcək dörd ədəd üçüncü nəsil müasir nüvə elektrik stansiyasının inşası həyata keçiriləcək.

Layihə İranın “Hormoz” şirkəti ilə Rusiyanın “Rosatom” şirkəti arasında razılaşdırılıb.

“İran və Rusiya Bushehr stansiyasından daha böyük gücə malik nüvə obyektlərinin inşası ilə bağlı danışıqlar aparıb”- deyə İran Atom Enerjisi Təşkilatının (İAET) sözçüsü Bəhruz Kamalvəndi Moskva şəhərində keçirilən “World Atom Week – Atom Expo 2025” sərgisi çərçivəsində jurnalistlərə açıqlamasında bildirib.

Kamalvəndi Rusiyanın Bushehr Nüvə Elektrik Stansiyasının tikintisində göstərdiyi əməkdaşlığı yüksək qiymətləndirib və bu stansiyanın beynəlxalq standartlara tam cavab verdiyini qeyd edib.

Atom Expo sərgisində İran nümayəndə heyətinə Atom Enerjisi Təşkilatının rəhbəri Məhəmməd İslami başçılıq edib.