BAKI, AzerVoice
İsveçin paytaxtı Stokholm və Yunanıstanın paytaxtı Atinada İsrailin Qəzza zolağına qarşı hərbi əməliyyatlarına etiraz olaraq nümayişlər keçirilib.
AzerVoice xəbər verir ki, Stokholmda bir araya gələn yüzlərlə etirazçı, İsrailin Qəzzadakı hərbi əməliyyatlarını "soyqırımı müharibəsi" adlandıraraq bu prosesin dayandırılmasını tələb ediblər. Odenplan Meydanında təşkil olunan aksiyada iştirakçılar İsrailə silah embarqosunun tətbiqini, İsrailli şirkətlərin boykot edilməsini və bu ölkə ilə bütün münasibətlərin dayandırılmasını istəyiblər.
Etirazçılar "Bu bir savaş deyil, soyqırımdır", "Azad Fələstin", "Katil İsrail", "Dirəniş, azadlıq, ədalət və yenidənqurma" kimi şüarlar səsləndiriblər.
Aksiyaya dəstək verən İsveçin nüfuzlu qəzetlərindən olan Aftonbladetin köşə yazarı Yan Gilyu İsrailin Fələstinlilərə qarşı soyqırımı həyata keçirdiyini bildirib. O, İsveç cəmiyyətində bu məsələyə münasibətin dəyişdiyini və getdikcə daha çox insanın Fələstini dəstəklədiyini qeyd edib.
Gilyu açıqlamasında dünyada bu məsələdə parçalanmanın yaşandığını vurğulayıb: "ABŞ İsrailin tərəfindədir. İsveç də bu yolda irəliləyir. Amma Norveç, İrlandiya və xüsusilə Türkiyə bu hadisələrə səssiz qalmır və Fələstini dəstəkləyir."
Yunanıstanın paytaxtı Atinada da İsrailin Fələstinə qarşı hərbi əməliyyatlarına etiraz olaraq nümayiş təşkil olunub. Sintagma Meydanında yerləşən parlament binası qarşısında toplaşan etirazçılar Panepistimiu küçəsi boyunca yürüş ediblər. Aksiya müxtəlif sol partiyaların və vətəndaş cəmiyyəti qurumlarının təşəbbüsü ilə keçirilib.
Nümayişçilər "Fələstinə azadlıq" və "Bu müdafiə deyil, soyqırımdır" kimi şüarlar səsləndiriblər.
Etirazçılardan olan Vangelia Sotivopulu açıqlamasında Fələstin məsələsinin bu gün dünyanın ən ciddi problemi olduğunu bildirib: "Əgər Fələstin itirilərsə, insanlıq ədaləti və beynəlxalq hüquq da itiriləcək."
Yunan etirazçılardan Despina Panayotopulu isə Yunanıstan hökumətinin İsraillə hərbi əməkdaşlığına qarşı çıxdıqlarını deyib. O, BMT-nin də bu hadisələri soyqırımı kimi tanıdığını xatırladaraq, “Yaşasın Fələstin xalqı!” şüarını səsləndirib.
Aksiyada çıxış edən digər iştirakçılar, o cümlədən Londondan gələn Chrisy A., dünya ictimaiyyətinin daha güclü və birgə reaksiya göstərməsinin vacibliyini vurğulayıblar.