BAKI, AzerVoice
Rusiya Prezidenti Vladimir Putin İsrailin Baş naziri Benyamin Netanyahu ilə telefon danışığı aparıb.
AzerVoice xəbər verir ki, bu barədə Kremlin mətbuat xidməti məlumat yayıb.
Məlumata əsasən, söhbət zamanı Yaxın Şərqdəki vəziyyət müzakirə olunub.
Putin, Suriyanın ərazi bütövlüyü və suverenliyinin qorunmasının vacibliyini vurğulayıb. O, Suriyada bütün etnik və dini qrupların qanuni hüquqlarının və maraqlarının qorunması ilə daxili siyasi sabitliyin gücləndirilməsinin əhəmiyyətini qeyd edib.
Qeyd edək ki, iyulun 13-də Suriyanın cənubundakı Suveyda vilayətində druz icmasının dəstələri ilə təhlükəsizlik qüvvələri arasında qarşıdurmalar baş verib. İyulun 15-də Suriya ordusu vilayət mərkəzinə daxil olaraq ərazidə sabitliyi bərpa etməyə çalışıb. Bu hadisədən qısa müddət sonra İsrail, druz əhalisini müdafiə etmək bəhanəsi ilə Suriya ordusuna qarşı hava hücumlarına başlayıb və iyulun 16-da Dəməşqdəki bir neçə strateji obyektə zərbələr endirib.
Putin, İranın nüvə proqramı ilə bağlı böhranın danışıqlar yolu ilə həll olunması üçün Moskvanın vasitəçilik etməyə hazır olduğunu bildirib.
İsrail isə İranın sülh məqsədli nüvə proqramı ilə bağlı suveren hüququnu qəbul etmir və bu texnologiyaların hərbi məqsədlərlə istifadə olunacağından ehtiyatlanır. ABŞ da bu məsələdə İsraili dəstəkləyir.
Putin və Netanyahu beynəlxalq və ikitərəfli gündəlikdəki aktual məsələlərlə bağlı dialoqu davam etdirmək barədə razılığa gəliblər.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək rütbəli hərbçi, o cümlədən İran Silahlı Qüvvələrinin Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər həlak olub. İran BMT Təhlükəsizlik Şurasının hadisə ilə əlaqədar fövqəladə iclas çağırılmasını istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.