BAKI, AzerVoice, Fərid Mikayılov

Malayziyanın Baş naziri Ənvər İbrahim Türkiyə Prezidenti Rəcəb Tayyib Ərdoğanın dəvəti ilə 6–8 yanvar tarixlərində Türkiyəyə rəsmi səfər edəcək.

AzerVoice xəbər verir ki, bu barədə Türkiyənin Kommunikasiya İdarəsinin rəhbəri Burhanəddin Duran sosial şəbəkə hesabında paylaşım edib.

Onun sözlərinə görə, səfər Türkiyə–Malayziya münasibətlərini yeni mərhələyə daşıyacaq və strateji tərəfdaşlığın daha da dərinləşdirilməsinə xidmət edəcək.

Məlumata əsasən, səfər çərçivəsində 7 yanvar tarixində Türkiyə–Malayziya Yüksək Səviyyəli Strateji Əməkdaşlıq Şurasının ilk iclası keçiriləcək. Bu toplantı iki ölkə arasında institusional əməkdaşlığın ən yüksək səviyyədə təsis olunması baxımından tarixi əhəmiyyət daşıyır.

Eyni zamanda, səfər zamanı Türkiyə ilə Malayziya arasında hüquqi və müqavilə bazasını möhkəmləndirəcək bir sıra sənədlərin imzalanması da nəzərdə tutulur.

Rəcəb Tayyib Ərdoğan ilə Baş nazir Ənvər İbrahim arasında keçiriləcək təkbətək və nümayəndə heyətləri səviyyəsində danışıqlarda ikitərəfli münasibətlərlə yanaşı, regional və beynəlxalq gündəmdə duran aktual məsələlərin də ətraflı müzakirə ediləcəyi gözlənilir.

Səfərin Türkiyə–Malayziya əlaqələrinin siyasi, iqtisadi və diplomatik istiqamətlər üzrə daha da möhkəmlənməsinə töhfə verəcəyi bildirilir.