BAKI, AzerVoice
Nigeriyada 2025-ci ilin iyun ayında baş verən silahlı hücumlar, terror aktları və zorakılıq hallarının nəticəsi olaraq 1111 nəfər həlak olub, 276 nəfər isə qaçırılıb.
AzerVoice xəbər verir ki, “Beacon Consulting” təhlükəsizlik və kəşfiyyat şirkətinin açıqladığı hesabatda bildirilir ki, hadisələrin böyük əksəriyyəti ölkənin şimal bölgələrində – xüsusilə çoban-fermer qarşıdurmaları, Boko Haram, eləcə də İŞİD-in Qərbi Afrika qolu olan ISWAP-ın hücumları nəticəsində qeydə alınıb.
Bununla yanaşı, təhlükəsizlik pozuntularının ümumi sayı ötən ayla müqayisədə azalma göstərib. May ayında 895 hadisə qeydə alınmışdısa, iyunda bu rəqəm 465-ə, yəni 48 faiz azalıb. Ölənlərin sayında da 14 faiz azalma müşahidə olunub — mayda 1296, iyunda isə 1111 nəfər həyatını itirib.
Qeyd edək ki, adam oğurluğu hallarında isə 74,5 faiz azalma müşahidə olunub — mayda 1086, iyunda isə 276 nəfər qaçırılıb.
Boko Haram və ISWAP terrorçuları ölkədə uzun illərdir ki, insan həyatını təhlükəyə atmağa davam edir. Hücumlar əsasən kəndlərə, məktəblərə və yolda olan sivil vətəndaşlara qarşı edilir, əsas motiv isə fidyə müqabilində adam oğurluğudur. Baxmayaraq ki, Nigeriyada bu cinayətə qarşı ölüm hökmü nəzərdə tutulub, proses hələ də davam edir.
