BAKI,AzerVoice, Fərid Mikayılov

Atalantanın nigeriyalı hücumçusu Ademola Lookman, yay transfer dönəmində İnterə keçidlə bağlı yaranmış mübahisələrin ardından yenidən komanda ilə məşqlərə qatılıb.

AzerVoice xəbər verir ki, İnter, 27 yaşlı futbolçunun transferi üçün 45 milyon avro təklif etsə də, Atalanta bu təklifi qəbul etməyib.

Məsələ səbəbilə avqust ayında klubla münasibətləri gərginləşən və hətta sosial media hesablarından Atalanta paylaşımlarını silən Lookman, milli komandadakı çıxışından sonra yenidən baş məşqçi İvan Yuriçin kollektivinə daxil olub.

Ötən mövsüm bütün turnirlərdə 20 qol vuran Lookman, Atalantanın hücum gücünün ayrılmaz hissəsi sayılır. Klub rəhbərliyi futbolçunun komandada qalmasını strateji baxımdan vacib hesab edir. Bu vəziyyət ötən mövsümdə də yaşanmış, transfer pəncərəsinin bağlanmasından sonra futbolçu geri dönərək komandanın uğurlarında həlledici rol oynamışdı.

Nigeriya millisinin heyətində Rvanda və Cənubi Afrika ilə keçirilən Dünya çempionatı seçmə oyunlarında ümumilikdə 165 dəqiqə oynayan Lookman, yaxşı fiziki hazırlığını nümayiş etdirib. Lakin hücumçunun Serie A-da Lecce qarşılaşmasında iştirakı gözlənilmir. Onun Çempionlar Liqasının açılış turunda PSJ ilə matç üçün heyətə daxil ediləcəyi ehtimal olunur.

Lookmanın qayıdışı ilə Atalantanın hücum xəttində alternativlər artır. O, Gianluca Skamakka və Charles De Ketelaere ilə birgə komandanın Avropa və Serie A hədəflərinə çatmasında mühüm rol oynayacaq.