BAKI, AzerVoice, Nailə Babazadə

Pakistanın Bəlucistan əyalətinin paytaxtı Kvetta şəhərində terror aktı törədilib. Məlumata görə, partlayıcı maddə yerləşdirilmiş avtomobillə həyata keçirilən hücumda təhlükəsizlik qüvvələrinin qərargahı hədəf alınıb.

AzerVoice xəbər verir ki, Pakistan rəsmiləri ilkin məlumatlara əsasən, hücum nəticəsində 8 nəfərin həyatını itirdiyini, çox sayda insanın isə yaralandığını bildiriblər.

Əyalətin polis rəsmilərinin açıqlamasına görə, Kvetta şəhərində yerləşən təhlükəsizlik qüvvələri qərargahının qarşısında baş verən partlayışdan öncə dörd silahlı şəxs avtomobillə əraziyə gələrək, maşından düşüb təhlükəsizlik qüvvələrinə atəş açıblar. Daha sonra avtomobilə yerləşdirilən bombanı partladıblar.

Bəlucistanın baş naziri Mir Sarfraz Buqti hadisə ilə bağlı verdiyi açıqlamada hücumu qətiyyətlə pislədiyini və təhlükəsizlik qüvvələrinin hər dörd hücumçunu zərərsizləşdirdiyini qeyd edib.

Qeyd edək ki, Pakistanda silahlı hücumlar əsasən Əfqanıstanla sərhəddə yerləşən Hayber Paxtunxva və Bəlucistan əyalətlərində cəmlənib. Hər iki bölgədə puştun və bəluc etnik qruplarının hüquqlarını müdafiə etdiklərini iddia edən silahlı dəstələr, həm təhlükəsizlik qüvvələrini, həm də dinc əhalini hədəf alırlar.

İslamabad rəhbərliyi Pakistan Talibançı Hərəkatının (TTP) hücumlarını Əfqanıstandakı mövqelərindən təşkil etdiyini bildirir. Lakin Əfqanıstan hakimiyyəti bu iddiaları rədd edir.

Bəlucistanda isə son illərdə daha çox Bəlucistan Azadlıq Ordusunun (BLA) hücumları diqqət çəkir. BLA, Bəlucistanın Pakistandan ayrılaraq müstəqil olması və bəluc xalqının bu bölgəni idarə etməsi tələbi ilə çıxış edir.