BAKI, AzerVoice
İsrail, Ramallahda yerləşən Fələstin Milli İdarəsini (FMİ) zəiflətmək və onu maliyyə blokadasına məruz qoymaq üçün bütün səylərini göstərir.
AzerVoice xəbər verir ki, bu barədə Fələstinin Baş naziri və Xarici İşlər naziri Məhəmməd Mustafa hökumət iclası zamanı deyib.
“İsrail FMİ-ni zəiflətmək və onu maliyyə blokadasına salmaq üçün fəal şəkildə addımlar atır. Bu addımlar FMİ-nin Qəzza zolağındakı əhaliyə qarşı öhdəliklərini yerinə yetirməsinə mane olmaq məqsədi daşıyır. Eyni zamanda, bu, beynəlxalq aləmdə bu məsələdə geniş konsensus olmasına baxmayaraq, Fələstin dövlətinin yaradılmasının qarşısını almağa yönəlib” – deyə, o bildirib.
Mustafanın sözlərinə görə, Qəzza zolağında yaxın zamanda atəşkəs rejiminə nail olunması ehtimalı artır. O əlavə edib ki, Qəzza əhalisinə yardım məqsədilə humanitar əməliyyatların koordinasiyasına hazırlıq görülür, həmçinin ərazinin bərpası üzrə konfransın təşkili planlaşdırılır.
Xatırladaq ki, 18 may tarixində İsrail ordusu “Gideonun Arabaları” adlı genişmiqyaslı quru əməliyyatı çərçivəsində Qəzza zolağının şimal və cənub bölgələrində hərbi əməliyyatlara başladığını elan edib. Əməliyyatın məqsədi HƏMAS-ın tamamilə məhv edilməsi və Qəzzada saxlanılan bütün israilli girovların azad olunması kimi göstərilir. İsrailin Baş naziri Benyamin Netanyahu bildirmişdi ki, əməliyyatın yekununda ordu Qəzza zolağının bütün ərazisinə nəzarəti ələ keçirməyi planlaşdırır.
Qəzzanın Səhiyyə Nazirliyinin məlumatına əsasən, 2023-cü il oktyabrın 7-dən bəri İsrailin həyata keçirdiyi hücumlar nəticəsində ümumilikdə 57 min 500-dən çox insan həlak olub, 136 min 800-dən çox fələstinli isə yaralanıb.
