BAKI,AzerVoice, Fərid Mikayılov

İsrailin baş naziri Benyamin Netanyahu bu həftə Vaşinqtona səfər edərək ABŞ prezidenti ilə İranla aparılan nüvə danışıqlarının daha geniş çərçivəyə salınmasını müzakirə etməyi planlaşdırır.

AzerVoice xəbər verir ki, Benyamin Netanyahu səfər zamanı Donald Trampı İranla aparılan dolayı danışıqlara yalnız nüvə proqramı deyil, həm də ballistik raket proqramı və Tehranın regiondakı silahlı qruplara dəstəyi məsələlərinin daxil edilməsinə razı salmağa çalışacaq.

Məlumata görə, İsrail tərəfi uzun müddətdir ki, İranın uranın zənginləşdirilməsini tam dayandırmasını, ballistik raket imkanlarını məhdudlaşdırmasını və regiondakı silahlı qruplarla əlaqələrini kəsməsini tələb edir. İran isə bu tələbləri rədd edərək yalnız sanksiyaların yüngülləşdirilməsi müqabilində nüvə proqramı üzrə məhdudiyyətləri müzakirə edə biləcəyini bildirib.

Netanyahunun Vaşinqton səfəri ABŞ-ın regionda hərbi mövcudluğunu artırdığı və İran–ABŞ dolayı danışıqlarının ötən həftə bərpa olunduğu bir dövrə təsadüf edir. Danışıqlar Maskatda ABŞ nümayəndələri ilə İranın xarici işlər naziri arasında aparılıb.

İsrail baş nazirinin ofisi bildirib ki, Netanyahu istənilən razılaşmanın İranın ballistik raket potensialının məhdudlaşdırılmasını və Tehranın “İran oxu” adlandırılan silahlı qruplara dəstəyinin dayandırılmasını əhatə etməli olduğunu hesab edir. Buraya HƏMAS və Hizbullah kimi qruplar daxildir.

İsraildə mövcud olan narahatlıqlara görə, Vaşinqton Tehranla yalnız uranın zənginləşdirilməsinin müvəqqəti dayandırılmasını nəzərdə tutan dar çərçivəli razılaşmaya gedə bilər. Analitiklərin fikrincə, belə razılaşma ABŞ üçün diplomatik uğur kimi təqdim olunsa da, İsrail bunu uzunmüddətli təhlükəsizlik baxımından riskli hesab edir.

Qeyd edək ki, Netanyahu bu il İsraildə keçiriləcək seçkilər ərəfəsində Vaşinqton səfərini daxili siyasi mövqeyini möhkəmləndirmək üçün də fürsət kimi görür. İsrail mediasında səfərin Netanyahunun ABŞ rəhbərliyi ilə sıx əlaqələrini nümayiş etdirməyə hesablandığı bildirilir.