BAKI,AzerVoice, Fərid Mikayılov

ABŞ Dövlət Departamenti İsrailə ümumi dəyəri 6,5 milyard dolları aşan genişmiqyaslı silah satışına rəsmi icazə verib.

AzerVoice xəbər verir ki, Pentaqona tabe olan Müdafiə Təhlükəsizlik Əməkdaşlıq Agentliyi (DSCA) yazılı açıqlama yayaraq, sözügedən satışların ABŞ Konqresinə rəsmi şəkildə bildirildiyini açıqlayıb.

Məlumata görə, ABŞ İsrailə 3,8 milyard dollar dəyərində 30 “Apache” helikopteri, eləcə də bu hava vasitələrində istifadə olunan müxtəlif ehtiyat hissələri və döyüş sursatlarının satışını təsdiqləyib.

Bundan əlavə, Dövlət Departamenti təxminən 2 milyard dollar məbləğində Birgə Yüngül Taktiki Avtomobillər (JLTV) və əlaqədar avadanlıqların da İsrailə verilməsinə razılıq verib.

Satış paketinə daxil olan digər müqavilə çərçivəsində isə təxminən 740 milyon dollar dəyərində “Namer” zirehli personal daşıyıcıları üçün güc sistemləri və inteqrasiya olunmuş logistik dəstək avadanlıqları təsdiqlənib.

Rəsmi açıqlamada bildirilib ki, bu satış İsrail quru qoşunlarının əməliyyat zamanı hərəkət qabiliyyətini artıracaq və ölkənin mövcud və gələcək təhlükələrə qarşı müdafiə imkanlarını gücləndirəcək.