BAKI, AzerVoice

Hindistanın Odişa ştatında yerləşən Puri şəhərində keçirilən ənənəvi Caqannath Rath Yatra hindu bayramı zamanı baş verən izdiham faciəyə səbəb olub.

AzerVoice xəbər verir ki, bu barədə "Hindustan Times" qəzetinin məlumat verib.

Məlumata görə, hadisə nəticəsində azı üç nəfər ölüb, 50-dən çox insan isə müxtəlif dərəcəli xəsarət alıb.

İzdiham, bayram mərasimlərinin başlamağını gözləyən təxminən 1 500 zəvvarın Caqannath məbədi yaxınlığında toplandığı vaxt baş verib. Həmin anda dini ayinlərdə istifadə olunacaq odun daşıyan iki yük maşını əraziyə daxil olub. Bu, izdihamın çaxnaşmasına səbəb olub, insanlar geriyə çəkilməyə başlayıb, yerə yıxılanlar olub və nəticədə ciddi sıxlıq yaranıb.

Hadisənin şahidlərinin sözlərinə görə, ərazidə insanların hərəkətinə dair aydın təşkilati plan olmayıb, giriş və çıxış yolları ayrıca müəyyən edilməyib. Yük maşınlarının hərəkətinə də nəzarət olunmayıb.

Hadisə ilə bağlı araşdırma başladılıb, Puri şəhərinin polis idarəsinin iki yüksək rütbəli əməkdaşı vəzifəsindən müvəqqəti uzaqlaşdırılıb. Yaralıların bəzilərinin vəziyyətinin kritik olduğu bildirilib.