BAKI, AzerVoice
"Tesla" iyulun 15-də Hindistanda ilk şou-rumunu açacaq və gələn aydan etibarən müştərilərə elektrik avtomobillərinin təhvil verilməsinə başlayacaq.
AzerVoice-un məlumatına görə, bu barədə "Bloomberg" agentliyi xəbər verib.
Bildirilib ki, ilk şourum Hindistanın Mumbay şəhərində, ikinci şou-rum isə iyulun sonunda Yeni Dehlidə fəaliyyətə başlayacaq. Şou-rumlarda potensial alıcılar qiymətlər və mövcud komplektasiyalar haqqında məlumat ala biləcəklər.
Elektriklə işləyən, arxa ötürücülü "Model Y" yolsuzluq avtomobillərindən ibarət ilk partiya artıq Çindəki zavoddan Hindistana gətirilib və onların təhvili avqustda başlanacaq.
Məlumat üçün bildirək ki, Hindistan dünyanın üçüncü ən böyük avtomobil bazarıdır və bu bazarın mənimsənilməsi "Tesla"ya digər regionlarda satışların azalmasını kompensasiya etməyə kömək edə bilər. İkinci rübdə şirkətin təhvilləri ötən ilin eyni dövrü ilə müqayisədə 13,5 faiz azalaraq 384 122 avtomobilə düşüb. Bu, şirkət tarixində ən pis göstərici olub və ardıcıl ikinci rübdə geriləmə qeydə alınıb.
Bundan əvvəl "Tesla" rəhbərliyi qeyd etmişdi ki, şirkətin Hindistan bazarına daxil olması qarşısında əsas maneə ölkəyə idxal edilən avtomobillər üçün tətbiq edilən yüksək gömrük rüsumlarıdır. Bu rüsumlar xaricdə istehsal olunan və dəyəri 40 min dollaradək olan avtomobillər üçün 70 faizə qədər yüksələ bilir. ABŞ-da isə "Tesla"nın ən populyar modeli olan "Model Y" təqribən 46,6 min dollara satılır.
