BAKI,AzerVoice, Fərid Mikayılov

Suriya hökuməti ilə YPG arasında əldə olunan razılaşmanın icrası çərçivəsində Suriya təhlükəsizlik qüvvələri Həsəkə şəhər mərkəzinə daxil olub.

AzerVoice xəbər verir ki, Suriya Daxili İşlər Nazirliyinə tabe olan daxili təhlükəsizlik qüvvələri Həsəkə şəhərinə şərq istiqamətindən daxil olub.

Suriya Daxili İşlər Nazirliyinin yaydığı rəsmi açıqlamada bildirilib ki, Mərvan əl-Əli, Həsəkə üzrə Daxili Təhlükəsizlik Komandanı, şəhərə giriş ərəfəsində bölmələrə konkret göstərişlər verib. O, təhlükəsizlik tapşırıqlarının əvvəlcədən təsdiqlənmiş planlar əsasında, qanunvericiliyə tam uyğun, ciddi intizam çərçivəsində icra edilməsinin vacibliyini vurğulayıb. Eyni zamanda, ictimai asayişin qorunması, vətəndaşların, eləcə də dövlət və özəl mülkiyyətin təhlükəsizliyinin təmin olunmasının prioritet olduğu qeyd edilib.

Dəməşq–YPG razılaşmasına əsasən, YPG-nin nəzarətində olan Həsəkə şəhəri və Qamışlı rayonunda təhlükəsizlik və dövlət idarəetmə strukturlarının mərhələli şəkildə Suriya hökumətinə təhvil verilməsi nəzərdə tutulur. Bu prosesin bölgədə uzunmüddətli sabitliyin təmininə yönəldiyi bildirilir.

Xatırladaq ki, yanvarın 30-da Suriya dövlət televiziyası hökumət mənbələrinə istinadən Dəməşq administrasiyası ilə YPG arasında atəşkəs və hərbi-idarəetmə strukturlarının mərhələli inteqrasiyasını ehtiva edən genişmiqyaslı razılaşmanın əldə edildiyini açıqlayıb. Razılaşmanın əsas məqsədi ölkənin ərazi bütövlüyünün bərpası, hüquqi idarəetmənin təmin edilməsi və Suriya üzrə yenidənqurma proseslərinin vahid mərkəzdən əlaqələndirilməsidir.