BAKI,AzerVoice, Fərid Mikayılov

İran Prezidenti Məsud Pezeşkian ABŞ ilə nüvə məsələsi üzrə danışıqların yenidən başlanması barədə rəsmi göstəriş verib.

AzerVoice xəbər verir ki, Tehran mərkəzli SNN agentliyi Pezeşkianın ABŞ tərəfi ilə nüvə mövzusunda müzakirələrin bərpasına dair tapşırıq verdiyini bildirib.

Tasnim agentliyinə danışan mənbələr isə danışıqların böyük ehtimalla İran xarici işlər naziri Abbas Əraqçi ilə ABŞ-ın xüsusi nümayəndəsi Stiv Uitkoff səviyyəsində aparılacağını qeyd edib.

İran Xarici İşlər Nazirliyinin sözçüsü İsmail Bəqayi açıqlamasında bildirib ki, sanksiyaların ləğvi və milli maraqların təmin edilməsi kontekstində ABŞ ilə mümkün danışıqların formatı diqqətlə qiymətləndirilir. Onun sözlərinə görə, Tehran diplomatik prosesdə ehtiyatlı və zamana həssas yanaşma sərgiləyəcək.

ABŞ mətbuatının yazdığına görə, xüsusilə Axios Donald Tramp administrasiyasının bu həftə ərzində danışıqlara açıq olduğunu bildirib. Bu addım 2025-ci ilin iyununda İsrailin İranın nüvə obyektlərinə hücumlarından sonra yaranmış gərginlik fonunda ilk ciddi diplomatik təşəbbüs kimi qiymətləndirilir.

Qeyd edək ki, Tehran və Vaşinqton 2025-ci ildə baş verən hərbi qarşıdurmalardan əvvəl Maskat vasitəçiliyi ilə beş raund dolayısı danışıqlar aparmışdı. Altıncı raundun keçirilməsi planlaşdırılsa da, regionda eskalasiya və ABŞ-ın İranın nüvə proqramına dair mövqeyi səbəbindən bu görüş ləğv edilmişdi.

İran tərəfi etimadın bərpası üçün ABŞ və Avropa ölkələrini “səmimi mövqe” nümayiş etdirməyə və maksimalist tələblərdən geri çəkilməyə çağırır.