BAKI,AzerVoice

Azərbaycan Respublikası Nazirlər Kabinetinin yeni qərarına əsasən, Əmək və Əhalinin Sosial Müdafiəsi Nazirliyi tərəfindən daha dörd sosial müavinət növü proaktiv mexanizm əsasında təyin olunacaq.

AzerVoice xəbər verir ki, proaktiv qaydada təyin ediləcək müavinətlər aşağıdakılardır:

• əmək qabiliyyətinin müvəqqəti itirilməsinə görə müavinət (qanunvericiliklə müəyyən edilmiş dövr üçün);
• hamiləliyə və doğuma görə müavinət;
• 3 yaşınadək uşağa qulluğa görə müavinət;
• dəfn üçün birdəfəlik müavinət.

Yeni mexanizmə uyğun olaraq, vətəndaşların bu müavinətləri alması üçün heç bir dövlət qurumuna müraciət etməsinə və əlavə sənəd təqdim etməsinə ehtiyac olmayacaq. Müavinətlər müvafiq informasiya sistemləri üzərindən avtomatik qaydada təyin ediləcək.

Məlumata görə, sözügedən müavinət növlərinin proaktiv qaydada təyin edilməsinə 2026-cı il mayın 1-dən etibarən başlanacaq.

Qərarda, eyni zamanda, minimum dövlət sosial standartları (MDSS) əsasında hesablanan bəzi müavinətlərin ödəniş qaydalarının və müddətlərinin daha humanist yanaşma prinsipləri əsasında təkmilləşdirilməsi də nəzərdə tutulub.

Qeyd edək ki, son illər sosial sahədə həyata keçirilən genişmiqyaslı rəqəmsallaşma proqramları nəticəsində hazırda Əmək və Əhalinin Sosial Müdafiəsi Nazirliyinin xidmətlərinin 90 faizdən çoxu elektron formada vətəndaşlara təqdim olunur.