BAKI,AzerVoice, Fərid Mikayılov

Suriya hökuməti ilə SDQ arasında elan edilən atəşkəsin müddətinin uzadılması ilə bağlı razılaşma əldə olunduğu bildirilir.

AzerVoice xəbər verir ki, tərəflər mövcud atəşkəs rejiminin bir aya qədər uzadılması barədə razılığa gəlib.

Qeyd edək ki, Dəməşq və SDQ arasında əvvəlcə dörd günlük atəşkəs elan edilmişdi və bu gün onun son günü idi.

Məlumata əsasən, atəşkəsin uzadılması qərarı bölgədə təhlükəsizlik və humanitar məsələlərlə bağlı proseslərin daha nəzarətli şəkildə aparılması məqsədi daşıyır. Xüsusilə, İŞİD üzvlərinin saxlanıldığı düşərgə və həbsxanalardan İraqa köçürülməsi prosesinin təhlükəsiz şəkildə həyata keçirilməsi bu qərarın əsas səbəblərindən biri kimi göstərilir.

Xatırladaq ki, Suriya hökuməti daha əvvəl SDQ-yə inteqrasiya və təhlükəsizlik razılaşmalarına əməl edilməsi üçün vaxt vermişdi. Son aylarda ölkənin müxtəlif bölgələrində hərbi və siyasi proseslər paralel şəkildə davam edib, bir sıra ərazilərdə nəzarət dəyişiklikləri baş verib.

Məsələ ilə bağlı rəsmi təsdiq hələlik açıqlanmayıb. Lakin diplomatik mənbələr bölgədə gərginliyin azaldılması və daha geniş razılaşmaya nail olunması istiqamətində danışıqların davam etdiyini bildirir.