BAKI, AzerVoice, Nailə Babazadə
Fələstin rəhbərliyi, İsraildə fələstinli məhbuslara ölüm cəzası verilməsini nəzərdə tutan qanun layihəsini “müharibə cinayətlərinin rəsmi elan edilməsi” kimi qiymətləndirib və bunu dəstəkləyənlərin cəzalandırılmasını tələb edib.
AzerVoice xəbər verir ki, Fələstin Xarici İşlər Nazirliyi, fələstinli məhbuslara ölüm cəzası verilməsini nəzərdə tutan qanun layihəsinin İsrail Parlamentinin Milli Təhlükəsizlik Komissiyası tərəfindən qəbul edilməsindən sonra yazılı açıqlama yayıb.
Açıqlamada bildirilib ki, bu layihə ilə müharibə cinayətləri və insanlığa qarşı cinayətlər qanunverici orqan vasitəsilə rəsmi şəkildə elan edilir və bu da İsraildə radikallığın və cinayətkarlığın nəzarətdən çıxaraq xroniki hala gəldiyini göstərir.
Açıqlamada həmçinin vurğulanıb ki, İsrailin məhkəmə sistemi və parlamenti cinayətlərin qanuniləşdirilməsi və cəzasızlığın təmin olunması vasitəsinə çevrilib.
Mətndə, məhbusların edamını nəzərdə tutan qanunun məhkəməsiz edam qərarı olduğu qeyd olunub və bunun Qəzza zolağında törədilən, hazırda Qərb Sahili və Qüdsə qədər uzanan soyqırımı cinayətlərinə yeni bir hal əlavə etmək niyyəti daşıdığı vurğulanıb.
Açıqlamada, sözügedən qanun layihəsinin İsrailin hüquq sistemi daxilindəki irqçi radikalizmi və faşizmi üzə çıxardığı, həmçinin 4-cü Cenevrə Konvensiyası da daxil olmaqla bütün beynəlxalq razılaşmaların, normaların və beynəlxalq hüququn açıq şəkildə pozulması olduğu qeyd olunub.
Bəyanatda vurğulanıb ki, bu qanun layihəsinin “onu təklif edən, qəbul edən və ya səs verənlərə qarşı beynəlxalq səviyyədə hər hansı addım atılmadan” qəbul edilməsi insanlıq üçün qara ləkə olacaq və məhkəməsiz edamlara şəriklik təşkil edəcək.
Fələstin Xarici İşlər Nazirliyi beynəlxalq ictimaiyyəti və hüquq qurumlarını işğalçı qüvvənin izlədiyi bu təhlükəli yolla mübarizə aparmağa, hesabatlılıq mexanizmlərini işə salmağa, bu yanaşmanı dəstəkləyən parlament üzvlərini terror siyahılarına salmağa, onları və bu irqçi qurumu boykot etməyə dərhal çağırıb.
İsrail Parlamentinin Milli Təhlükəsizlik Komissiyası fələstinli məhbuslara ölüm cəzası verilməsini nəzərdə tutan qanun layihəsini qəbul edərək onun parlamentdə səsə çıxarılmasının yolunu açıb.
Mübahisəli qanun layihəsinə əsasən, İsrail məhkəməsi bir israillini “millətçi səbəblərlə” öldürənlərə ölüm cəzası verə bilər.
Lakin layihə qanunlaşacağı təqdirdə, bu maddə fələstinliləri öldürən israillilərə şamil edilməyəcək.