BAKI, AzerVoice, Nailə Babazadə
Qəzza Bələdiyyəsi bölgədə 250 mindən çox ton zibilin yığılması, tullantı sularının küçələrə sızması və təmiz su çatışmazlığı səbəbilə Fələstin xalqının ciddi ekoloji və sağlamlıq riskləri ilə üzləşdiyini açıqlayıb.
AzerVoice xəbər verir ki, bələdiyyənin sözçüsü Asim ən-Nəbih bildirib ki, İsrailin Qəzzada iki ildir davam edən soyqırımı nəticəsində bələdiyyəyə məxsus nəqliyyat vasitələrinin və avadanlıqların 85 faizindən çoxu sıradan çıxıb və nəticədə 250 min ton tullantı toplanıb.
“Qəzza su qıtlığı və şəhər boyu yığılmış dörddə bir milyon ton tullantı da daxil olmaqla, vətəndaşların həyatını təhdid edən müxtəlif sağlamlıq və ekoloji fəlakətlərlə üz-üzədir.” - deyə Nəbih qeyd edib.
O, şəhərin müxtəlif yerlərində zibil yığınlarının getdikcə artdığını, bunun da gəmiricilərin və zərərvericilərin çoxalmasına, yoluxucu xəstəliklərin və epidemiyaların yayılmasına səbəb olduğunu bildirib. Nəbih əlavə edib ki, İsrail Qəzza Bələdiyyəsinin Cuhar əd-Dikdə yerləşən zibil poliqonuna daxil olmasına icazə vermir.
“Qəzzada içməli su çatışmazlığı zibil yığılması ilə eyni vaxtda yaşanır. Bu vəziyyət yüz minlərlə insanın həyatını təhdid edir. Bələdiyyənin təmizlik işlərini həyata keçirmək üçün kifayət qədər texnika, yanacaq və avadanlığı da yoxdur.” - deyə Nəbih əlavə edib.
Nəbih bildirib ki, İsrail qüvvələri bələdiyyə işçilərinin zibilləri daşımasına icazə vermədiyi Cuhar əd-Dik bölgəsi ABŞ prezidenti Donald Trampın sülh planına görə “Sarı Xətt” adlandırılan, İsrail ordusunun nəzarətində olan ərazidir.
“İsrail ordusu geri çəkilmə xəttinin şərqindəki bölgələri tam nəzarət altında saxlayır,” – deyə Nəbih qeyd edib və bu səbəbdən bələdiyyə işçilərinin “Qəzzanın tullantılarını həmin əraziyə daşıya bilmədiyini” vurğulayıb.
“Kanalizasiya sularının sızması nəticəsində bir çox küçələr yaşayış üçün yararsız hala gəlib. Bu vəziyyət epidemiya riskini artırır.” - deyə Nəbih əlavə edib.
O, beynəlxalq ictimaiyyətə “təcili müdaxilə” çağırışı edərək xəbərdarlıq edib.
“Yeni nəqliyyat vasitələrinin və yanacağın girişinə icazə verilməsə, Qəzza xalqı xəstəliklər və epidemiyalar səbəbindən ölməyə başlayacaq.” - deyə Nəbih qeyd edib.
Qəzzadakı Fələstin hökumətinin məlumatına görə, İsrailin hücumları nəticəsində son iki ildə təxminən 700 min metrlik kanalizasiya xətləri məhv edilib.
İsrailin Qəzzaya qarşı iki ildir davam edən hücumları nəticəsində 68 min 527 fələstinli həyatını itirib, 170 mindən çox insan yaralanıb.