BAKI, AzerVoice – İsrailin hava hücumları nəticəsində Qəzza zolağının mərkəzində yerləşən Nüsəyrat qaçqın düşərgəsində azı 30 fələstinli həyatını itirib. Qurbanların əksəriyyətini qadınlar və uşaqlar təşkil edir. AzerVoice xəbər verir ki, mülki evlər hədəfə alınıb, məhv edilənlər arasında ailələr var

Fələstin Mülki Müdafiə İdarəsinin sözçüsü Mahmud Bəsalın verdiyi məlumata görə, İsrail qırıcılarının bazar ertəsi gecə və çərşənbə axşamı səhər saatlarında Nüsəyrat düşərgəsinə həyata keçirdiyi hava zərbələri nəticəsində mülki yaşayış evləri dağıdılıb.

“İşğalçı qüvvələr Nüsəyrat düşərgəsində yeni bölgədə yerləşən bir neçə mülki evi bombalayıb. Bu, növbəti soyqırımı aktıdır. Qurbanların böyük hissəsi qadınlar və uşaqlardır.”-deyə, Bəsal hadisəni belə xarakterizə edib.

Yaralılar və cəsədlər düşərgədə yerləşən Əl-Avda xəstəxanasına aparılıb.

İsrail yardım təzyiqləri fonunda 10 saatlıq atəşkəs elan etmişdi

Qəzzada aclığın daha da dərinləşməsi fonunda beynəlxalq təzyiqlər artdığı üçün, İsrail ötən həftəsonu bəyan etmişdi ki, Qəzza şəhəri, Deyr əl-Bələh və Mavasi bölgələrində hər gün 10 saatlıq əməliyyat fasiləsi veriləcək. Həmçinin yardım karvanları üçün “təhlükəsiz dəhlizlər” təyin ediləcəyi açıqlanmışdı. Beynəlxalq təşkilatlar bu çərçivədə havadan yardım atılmasını yenidən bərpa ediblər.

Lakin beynəlxalq yardım təşkilatları bildirirlər ki, bu tədbirlər Qəzzadakı artan aclıq və humanitar fəlakətə qarşı yetərli deyil. Bölgədə qida və dərman çatışmazlığı kritik həddə çatıb və əhalinin həyatı ciddi təhlükə altındadır.