BAKI,AzerVoice, Nailə Babazadə

ABŞ Prezidenti Donald Tramp, həyata keçirdikləri hava hücumlarından sonra İranın nüvə proqramını yenidən başlatmaq təşəbbüsündə bulunduğunu iddia edib.

AzerVoice xəbər verir ki, Tramp, İran ilə cümə günü Omanın paytaxtı Maskatda keçirilməsi gözlənilən görüşlər ərəfəsində "NBC News"a gündəmlə bağlı açıqlamalar verib.

İranın ABŞ ordusunun vurduğu nüvə obyektlərinə qayıda bilmədiyini, lakin ölkənin başqa bir nöqtəsində yeni bir nüvə obyekti qurmağı düşündüyünü irəli sürən Tramp: "Bunu öyrəndik və 'Bunu etsəniz, çox ağır nəticələri olar' dedim," — ifadəsini işlədib.

ABŞ və müttəfiqi İsrail İranı nüvə silahı inkişaf etdirməyə çalışmaqda ittiham edərkən, İran isə nüvə proqramının elektrik enerjisi istehsalı da daxil olmaqla dinc məqsədlərə yönəldiyini müdafiə edir.

Ağ Ev rəsmisi İranla danışıqların 6 fevral cümə günü Omanın paytaxtı Maskatda keçiriləcəyini bildirmişdi.

ABŞ Dövlət Katibi Marko Rubio mövzu ilə bağlı açıqlamasında, İranla keçiriləcək görüşlərdə bəzi başlıqların mütləq masada olmalı olduğunu vurğulayaraq: "Danışıqların həqiqətən mənalı bir nəticəyə çatması üçün bəzi mövzuları əhatə etməsi lazımdır. Bunların arasında ballistik raketlərin mənzili, bölgədəki terror təşkilatlarına verdikləri dəstək, nüvə proqramları və öz xalqına qarşı rəftarları yer alır," — demişdi.

İsrail, İran ilə ABŞ arasında nüvə danışıqları prosesi davam edərkən, 13 iyun 2025-ci ildə İranın müxtəlif şəhərlərində nüvə və hərbi obyektləri, həmçinin mülki yaşayış məntəqələrini hədəf alan hücumlar başlatmışdı.

İsrailə açıq dəstək verən ABŞ, 22 iyun 2025-ci ildə İranın Nətənz, Fordo və İsfahandakı 3 nüvə obyektinə, yalnız ABŞ-ın sahib olduğu və "sığınacaq dağıdan" bombalarla "Gecə yarısı çəkici" adını verdiyi əməliyyatla hücumlar təşkil etmişdi.

ABŞ Prezidenti Tramp hücumları "böyük uğur" kimi xarakterizə edərkən, mediaya sızan ilk zərər qiymətləndirmə hesabatında hücumların İranın nüvə proqramını "məhv etmədiyi", sadəcə "bir neçə ay gerilətdiyi" irəli sürülmüşdü.