BAKI, Azervoice, Nərmin Ağayeva

30 illik araşdırma nəticəsində məlum olub ki, tamyağlı süd az yağlı südlə müqayisədə ürək xəstəliyi və ölüm riskini artırır.

Azervoice xəbər verir ki, “The American Journal of Clinical Nutrition” jurnalında dərc olunan tədqiqatda Norveçdə 1974–1988-ci illər arasında aparılmış üç böyük ürək-damar sağlamlığı müayinəsinin nəticələri təhlil edilib. 33 il ərzində izlənilən 73 min 860 nəfərin məlumatlarına əsasən, tam süd içənlərdə hər hansı səbəbdən ölüm riski 22 faiz, ürək-damar xəstəliklərindən ölüm riski isə 12 faiz çox olub.

Analiz göstərib ki, az yağlı süd istehlakı tam süd ilə müqayisədə ümumi ölüm riskini 11 faiz, ürək-damar xəstəlikləri riskini isə 7 faiz azaldır. Araşdırmada qeyd olunur ki, 1970-ci illərdə Norveçdə əksər insanlar tam süd istehlak edirdisə, 1980-ci illərdə az yağlı südə üstünlük verilməsi alimlərə bu iki növ südün uzunmüddətli sağlamlıq təsirlərini müqayisə etmək imkanı yaradıb.

Qeyd edək ki, Böyük Britaniya Milli Səhiyyə Xidməti (NHS) də doymuş yağın həddindən artıq qəbulunun xolesterol səviyyəsini yüksəltdiyini, bunun isə infarkt və insult riskini artırdığını bildirir.