BAKI, AzerVoice, Orxan Qədirzadə

Türkiyə Prezidenti Rəcəb Tayyib Ərdoğan Nigeriya Prezidenti Bola Əhməd Tinubu ilə Ankarada keçirilən görüşdən sonra mühüm açıqlamalar verib.

AzerVoice xəbər verir ki, Türkiyəyə rəsmi səfər edən Nigeriya Prezidenti Bola Əhməd Tinubu rəsmi mərasimlə qarşılanıb, nümayəndə heyətləri arasında aparılan danışıqlardan sonra iki lider birgə mətbuat konfransı keçirib. Prezident Rəcəb Tayyib Ərdoğan çıxışında Türkiyə–Nigeriya münasibətlərinin daha da inkişaf etdirilməsi üçün konkret addımlar atıldığını bildirib.

Ərdoğan qeyd edib ki, görüşlərdə ikitərəfli əlaqələrin bütün istiqamətləri nəzərdən keçirilib və 5 milyard dollarlıq ticarət dövriyyəsi hədəfi müzakirə olunub. Onun sözlərinə görə, Nigeriya Afrikanın ən böyük təbii qaz istehsalçısıdır və ölkənin iqtisadiyyatının yenidən qurulmasında enerji sektoru mühüm rol oynayır. Türkiyə bu sahədə əməkdaşlığa, xüsusilə Türkiyə Petrolları vasitəsilə birgə layihələrə önəm verir.

Prezident vurğulayıb ki, Türkiyə Nigeriya xalqının yanındadır və müdafiə sənayesi sahəsində də əməkdaşlığa hazırdır. Ərdoğan bildirib ki, Nigeriya şirkətlərinin Türkiyənin müdafiə sənayesi müəssisələri ilə quracağı əlaqələr yaxın gələcəkdə real nəticələr verə bilər.

Dövlət başçısı, həmçinin Nigeriyanın gənc əhalisi üçün təhsil sahəsində yeni təşəbbüslərin planlaşdırıldığını, təhsil üzrə əməkdaşlığın münasibətləri daha da gücləndirəcəyini diqqətə çatdırıb və Prezident Tinubuya Türkiyəyə səfərinə görə təşəkkür edib.

Nigeriya Prezidenti Bola Əhməd Tinubu isə çıxışında səmimi qarşılanmaya və göstərilən qonaqpərvərliyə görə minnətdarlığını bildirib. O qeyd edib ki, danışıqlarda ortaq rifah, azadlıq və sabitliyin təmin edilməsi məsələləri müzakirə olunub, xüsusilə Afrikanın sabitliyinə töhfə verə biləcək birgə fəaliyyətlər üzərində dayanılıb.