BAKI, AzerVoice, Nailə Babazadə

ABŞ ordusu Sakit okeanın şərq hissəsində əvvəldən müəyyən edilmiş narkotik qaçaqmalçılığı marşrutu ilə hərəkət etdiyi və narkotik daşınması ilə məşğul olduğu iddia edilən bir gəmiyə zərbə endirib.

AzerVoice xəbər verir ki, ABŞ Cənub Komandanlığı (SOUTHCOM) hücumla bağlı Amerikanın X sosial media platformasındakı rəsmi hesabı vasitəsilə açıqlama yayıb.

Açıqlamada bildirilib ki, ABŞ-ın müdafiə naziri Pit Heqsetin göstərişi ilə narkotik qaçaqmalçılığı fəaliyyəti ilə məşğul olduğu müəyyən edilən və əvvəldən izlənilən marşrut üzrə hərəkət edən gəmiyə ölümcül hücum həyata keçirilib.

Hücum nəticəsində iki nəfərin öldüyü qeyd olunan açıqlamada, hadisədən sağ çıxan bir şəxs üçün axtarış-xilasetmə əməliyyatlarının davam etdiyi vurğulanıb.

Son dövrlər ABŞ ordusunun Karib hövzəsi və Sakit okeanda narkotik qaçaqmalçılığı ilə məşğul olduqları iddia edilən bəzi qayıq və gəmilərə hücumlar təşkil etməsi, eləcə də içəridə olan şəxsləri birbaşa hədəf alması beynəlxalq ictimaiyyətdə “məhkəməsiz edam” müzakirələrinə səbəb olur.