BAKI, AzerVoice, Nailə Babazadə
İsrailin Baş naziri Benyamin Netanyahu, bir həftə əvvəl Dohada həyata keçirilən hava hücumundan sonra Qətərə qarşı “sözlü” hücumlarını artırıb.
AzerVoice xəbər verir ki, Yedioth Ahronoth və Maariv qəzetlərinin məlumatına görə, Netanyahu Qüdsün qərbində yerləşən ofisində mətbuat konfransı keçirib.
Netanyahu bildirib ki, Qətərə qarşı sərt tənqidlər səsləndirib və "bunları müharibə zamanı ifadə etdiyini" deyib.
"Qətər istəsəydi, çox daha güclü təzyiq göstərə bilər və oğurlanan bütün vətəndaşlarımızın (israilli əsirlərin) azad olunmasına yardımçı ola bilərdi" deyə iddia edən Netanyahu, Qətərin HƏMAS-la əlaqəli olduğunu, HƏMAS-ı dəstəklədiyini, ona ev sahibliyi etdiyini və maliyyələşdirdiyini bildirib.
O, Al Jazeera televiziya kanalına baxanların orada antisemitizm, antisiyonizm və illərdir davam edən anti-Amerikanizm görə biləcəklərini iddia edib.
Netanyahu ölkəsinin Qətərə qarşı aqressiv davranışını haqlı çıxarmağa çalışaraq, 11 sentyabr 2001 hadisələrindən iki həftə sonra qəbul edilən BMT Təhlükəsizlik Şurasının 1373 saylı qətnaməsinə istinad edib.
Netanyahu deyib ki, BMT Təhlükəsizlik Şurası həmin qətnamədə terrorçuların “harada olurlarsa olsunlar zərərsizləşdirilməsi” qərarını verib və qərarda göstərilib ki, terrorçular hər hansı bir dövlətin ərazisində sığınacaq, maliyyə və ya müdafiə alsalar belə, terrorçu kimi qiymətləndirilməlidirlər.
O əlavə edib ki, ABŞ bu qərara əsaslanaraq terrorçu kimi qiymətləndirdiyi şəxslərin yaşadığı Əfqanıstanı, daha sonra isə Pakistani bombalayıb.
Netanyahu bildirib ki, ortada açıq nəticə var – onlar Qətərdə hərəkətə keçiblər və HƏMAS artıq sığınacaq tapa bilmir. Bu isə HƏMAS liderlərinə və İsrailin hər yerdəki düşmənlərinə çox güclü mesajdır.
O həmçinin qeyd edib ki, Qətərlə heç bir ticarət əlaqəsi yoxdur və bu məsələyə maraq göstərmir.
Qeyd edək ki, İsrail ordusu 9 sentyabrda Dohada HƏMAS-ın danışıqlar heyətinin yerləşdiyi binaya hava hücumu təşkil edib.
Hücum zamanı HƏMAS-ın siyasi bürosunun üzvü Halil əl-Hayyenin oğlu, 4 HƏMAS üzvü və bir Qətər polisi olmaqla ümumilikdə 6 nəfər həyatını itirib. HƏMAS-ın rəhbər heyəti isə hücumdan salamat çıxıb.
İsrail Baş naziri Netanyahu isə 10 sentyabrda verdiyi açıqlamada Qətərə belə deyib: “Ya onları (HƏMAS üzvlərini) ölkədən çıxarırsınız, ya da ədalətə təhvil verirsiniz. Əgər etməsəniz, biz edəcəyik.” – deyə yeni hücum təhdidi irəli sürüb.
