BAKI, AzerVoice Analitik təhlil mərkəzi, Səməd Əyyubov
İsrailin “Haaretz” qəzeti yazır ki, ordu Qəzza şəhərini işğal etmək üçün həm çağırışçı əsgərlərin, həm də binaların dağıdılması üçün zəruri olan buldozerlərin çatışmazlığından əziyyət çəkir.
Çərşənbə günü İsrail ordusu Qəzza şəhərinin tam işğalı üçün “Gideon Arabaları - 2” adlı əməliyyata start verib. Qəzet yazır ki, ilkin açıqlamalarda çağırılan ehtiyat əsgərlərin əksəriyyətinin İordan çayının Qərb sahili və İsrailin şimalında (Livan və Suriya istiqamətində) xidmət edən nizami qüvvələrin yerini alacağı bildirilmişdi. Lakin indi ən azı üç ehtiyat briqadasının birbaşa Qəzzada yerləşdirilməsi planlaşdırılır.
Məlumata görə, müharibənin əvvəlindən fərqli olaraq, ordu artıq çağırışçıların əməliyyata qoşulma faizini açıqlamır. Bununla belə, şəxsi heyətin səfərbərində çətinliklərin mövcud olduğu etiraf edilir və əməliyyat planlarının mövcud qüvvələrin sayına uyğun olaraq dəyişdiriləcəyi vurğulanır.
Əsgərlərin etirazı - Ordunun məsuliyyəti nə yerdədir?
Bəzi çağırışçılar mətbuata açıqlamasında toplama məntəqələrinə gəldiklərini, lakin uzunmüddətli xidmət etmələrinin gözlənilmədiyini bildiriblər. Onlardan biri deyib: “Açıq imtina yoxdur, amma qeyri-rəsmi etiraz var. Hamı gəlir, imza atır, sonra isə komandirləri ilə fərdi razılıq əldə edir.”
Onun sözlərinə görə, bəziləri ayda bir həftə, digərləri yalnız həftəsonları xidmət edir, bəziləri isə ümumiyyətlə öhdəlik götürmür. Ordu isə bu vəziyyətə göz yumur, əsas şərt odur ki, məsələ rəsmi şəkildə üzə çıxmasın.
Buldozer çatışmazlığı
Nəşr yazır ki, orduda ciddi texnika problemi də yaşanır. 2023-cü il oktyabrın 7-dən mövcud olan 200-ə yaxın buldozerin yarısı döyüşlərdə sıradan çıxıb. Daha sonra əlavə 165 buldozer sifariş verilib, amma onların yalnız 65-i təhvil alınıb. Yeni texnikaların Qəzza əməliyyatında istifadəsi gözlənilmir, çünki onların zirehlərlə təchizatı yalnız oktyabr və ya noyabrda başa çatacaq.
Ordu və təxliyə məsələsi
Hərbi mənbələr Qəzza şəhərində yaşayan təxminən 200 min nəfərin (yəni əhalinin 20 faizinin) təxliyədən imtina edəcəyini güman edir. Onlar həyatları risk altında olsa belə, evlərini tərk etməyəcəklər. İsrail ordusu isə təxminən bir milyon nəfərlik əhalini cənuba köçməyə məcbur etməyə çalışır.
Hazırda 70 minə yaxın fələstinli şəhəri tərk edib. Ordu hələ ki, mərkəzi və sıx məhəllələrə daxil olmayıb, daha çox kənar ərazilərdə fəaliyyət göstərir. Rəsmi açıqlamalara görə, qüvvələrin irəliləmə sürəti fələstinlilərin şəhəri tərk etmə tempi ilə müəyyən ediləcək.
Genişmiqyaslı bombardmanlar nəticəsində Qəzza sakinləri müharibə başlayandan bəri dəfələrlə köçmək məcburiyyətində qalıblar və artıq bölgədə təhlükəsiz yer qalmayıb. Quru əməliyyatları başlayarkən İsrail artilleriyası şəhər ətrafındakı boş əraziləri atəşə tutub ki, bu da əhalini təxliyəyə məcbur etmək məqsədi daşıyır.
Qəzet əlavə edir ki, ordu son günlər siyasi rəhbərliyə şəhərə tam nəzarət etməyin Qəzza zolağının böyük hissəsinə nəzarət ətmək anlamına gəldiyini bildirib. Bu isə İsrailin fələstinlilərə qarşı tam məsuliyyət götürməsi ilə nəticələnəcək. Belə bir halda, ordunun qida təminatı, tibbi xidmət, su, elektrik, kanalizasiya kimi infrastrukturun işləməsini də təmin etməsi tələb olunacaq.