BAKI, AzerVoice Azərbaycan İslam Ensiklopediyası
Türkiyənin Diyanət İşləri Başçısı Ali Erbaş akademik fəaliyyəti və dövlət idarəçiliyində tutduğu vəzifələrlə tanınan din xadimi və alimdir. Ali Erbaş 1961-ci ildə Türkiyənin Ordu vilayətinin Kabadüz rayonunun Yeşilyurt kəndində anadan olub. İbtidai təhsilini doğma kəndində alan Erbaş 1980-ci ildə Sakarya İmam-Hatip Liseyini, 1984-cü ildə isə Mərmərə Universitetinin İlahiyyat Fakültəsini bitirib.
1982–1993-cü illərdə Diyanət İşləri Başçılığına bağlı İstanbulun Fatih rayonunda müxtəlif məscidlərdə din xadimi kimi fəaliyyət göstərib. Elmi fəaliyyətini paralel şəkildə davam etdirən Ali Erbaş “Quranda təkrarlar” mövzusunda magistr dissertasiyası müdafiə edib, 1993-cü ildə isə “İlahi dinlərdə mələk inancı” adlı işi ilə dinlər tarixi üzrə doktorluq dərəcəsi alıb.
1988–1990-cı illərdə İstanbul Haseki Təhsil Mərkəzində magistr və doktorantlar üçün təşkil olunan ixtisasartırma proqramlarında iştirak edib. 1993-cü ildə Sakarya Universitetinin İlahiyyat Fakültəsində Dinlər Tarixi kafedrasında köməkçi dosent təyin olunub. Elmi araşdırmalarını genişləndirmək məqsədilə 1994-cü ildə Parisdə Corc Pompidu Mərkəzi və Sorbonna Universitetinin kitabxanalarında tədqiqatlar aparıb, 1996–1997-ci tədris ilində isə Strasburq Humanitar Universitetində qonaq professor kimi çalışıb.
Türkiyəyə qayıtdıqdan sonra 1998-ci ildə dosent, 2004-cü ildə professor elmi adını alıb. 1993–2006-cı illərdə Dinlər Tarixi kafedrasına, eyni zamanda Fəlsəfə və Din Elmləri Bölməsinə rəhbərlik edib. 1997–2002-ci illərdə Sakarya Universiteti İlahiyyat Fakültəsinin dekan müavini, 2006–2011-ci illərdə isə iki müddət həmin fakültənin dekanı olub.
2011-ci ildə Diyanət İşləri Başçılığı yanında Təhsil Xidmətləri Baş İdarəsinin rəhbəri təyin edilən Ali Erbaş, 8 iyun 2017-ci ildə Yalova Universitetinin rektoru vəzifəsinə gətirilib. Elə həmin ilin 17 sentyabr tarixində Türkiyənin Diyanət İşləri Başçısı təyin olunub.
Türkiyədə və xaricdə nəşr edilmiş 12 kitabın müəllifi olan Prof. Dr. Ali Erbaşın çoxsaylı elmi məqalələri, beynəlxalq simpozium və konfranslarda təqdim olunmuş məruzələri var. O, ərəb və fransız dillərini mükəmməl bilir. Ali Erbaş evlidir, dörd övladı var.