BAKI, AzerVoice
Türkiyə və Macarıstan enerji əməkdaşlığını genişləndirir.
AzerVoice xəbər verir ki, Türkiyənin
dövlət enerji şirkəti TPAO və Macarıstanın aparıcı enerji şirkəti
MOL Macarıstanda iki qaz yatağında təbii qazın kəşfiyyatı və
hasilatı üzrə birgə fəaliyyət göstərəcək.
Razılaşma Budapeştdə Türkiyənin Enerji və Təbii Sərvətlər naziri
Alparslan Bayraktar və Macarıstanın Xarici İşlər və Xarici Ticarət
naziri Peter Siyarto tərəfindən ictimaiyyətə açıqlanıb.
Nazir Alparslan Bayraktar bildirib ki, bu əməkdaşlıq təkcə iki ölkə arasında enerji sahəsindəki əlaqələrin möhkəmlənməsi deyil, həm də Avropanın enerji təhlükəsizliyinə töhfə verəcək bir addımdır. Onun sözlərinə görə, bu layihə vasitəsilə Türkiyə öz enerji şirkətlərinin beynəlxalq bazarlardakı mövcudluğunu gücləndirməyə davam edir.
Sazişə əsasən, TPAO və MOL şirkətləri Macarıstanın qərb bölgəsində yerləşən və enerji potensialı yüksək olan iki yataqda birgə kəşfiyyat və hasilat işləri aparacaqlar. Hazırda texniki hazırlıq və geoloji tədqiqat mərhələsi davam edir. İlk qazma işlərinin isə 2025-ci ilin sonuna qədər başlanacağı gözlənilir.
Macarıstan tərəfi bu əməkdaşlığın ölkənin enerji təchizatının şaxələndirilməsi baxımından strateji əhəmiyyət daşıdığını bildirib. Macarıstanın Xarici İşlər və Xarici Ticarət naziri Peter Siyarto deyib ki, bu cür ortaq layihələr həm regional enerji təhlükəsizliyini artıracaq, həm də enerji asılılığını azaltmağa kömək edəcək.
Qeyd edək ki, TPAO-nun bu addımı Türkiyənin “enerji ixracatçısı ölkə” strategiyasına uyğun atılmış mühüm addımlardan biridir. Son illər ərzində TPAO Qara dənizdə və Şərqi Aralıq dənizində apardığı qaz kəşfiyyat işləri ilə regionda öz nüfuzunu artırmışdı. İndi isə şirkət Avropada enerji hasilatında iştirak etməklə daha geniş coğrafiyada fəaliyyət göstərməyə başlayır.
