BAKI,AzerVoice, Fərid Mikayılov
Vyetnamdan Rusiyaya uçan “Azur Air” aviaşirkətinə məxsus Nyaçanq–İrkutsk marşrutu üzrə Boeing 757 tipli sərnişin təyyarəsi planlaşdırılmamış şəkildə Hanoy hava limanına eniş edib.
AzerVoice xəbər verir ki, aviaşirkətin mətbuat xidmətinin məlumatına görə, ZF-2578 saylı reys Vyetnamın Nyaçanq şəhərindən Rusiyanın İrkutsk şəhərinə uçuş zamanı texniki səbəblərlə Hanoy hava limanına yönləndirilib.
Təyyarənin göyərtəsində 7 ekipaj üzvü və 238 sərnişin olub. Hadisə nəticəsində xəsarət alan olmayıb.
Aviaşirkət bildirib ki, planlaşdırılmamış eniş səbəbindən uçuş cədvəlinə dəyişikliklər edilə, gecikmələr və reyslərin vaxtının dəyişdirilməsi mümkündür. Sərnişinlərə Rusiya Federasiyasının müvafiq aviasiya qaydalarına uyğun olaraq bütün zəruri xidmətlər təqdim ediləcək.
“Azur Air” qeyd edib ki, aviaşirkətin bütün xidmətləri gücləndirilmiş rejimdə fəaliyyət göstərir və sərnişinlərə xidmətin təmin olunması, eləcə də uçuşun Rusiyaya davam etdirilməsi üçün lazımi tədbirlər görülür.