BAKI, AzerVoice, Nailə Babazadə
Türkiyə Milli Müdafiə Nazirliyi (MSB) Suriyada fəaliyyət göstərən Suriya Demokratik Qüvvələrinin (SDQ,PKK-nın Suriya qolu) mövqelərinə dair yeni bəyanat yayıb. Rəsmi açıqlamada vurğulanıb ki, SDQ silahsızlanma və Suriya dövlətinə inteqrasiya ilə bağlı götürdüyü öhdəlikləri yerinə yetirmir.
AzerVoice xəbər verir ki,nazirliyin sözlərinə görə, bu hal həm Suriyanın siyasi birliyi və ərazi bütövlüyünü, həm də Türkiyənin milli təhlükəsizliyini ciddi şəkildə təhdid edir.
“SDQ terror təşkilatı Suriya ordusuna inteqrasiya prosesinə əməl etməli, Suriyanın siyasi birliyi və torpaq bütövlüyünə zərər verə biləcək bütün fəaliyyət və açıqlamalardan imtina etməlidir”-deyə MSB-nin bəyanatında xüsusi olaraq qeyd olunub.
Nazirlik əlavə edib ki, SDQ-nin mövcud mövqeyi bölgədə qeyri-sabitliyi artırır və uzunmüddətli sülhə mane olur.
Türkiyə rəsmiləri dəfələrlə bəyan ediblər ki, Suriyanın şimalında fəaliyyət göstərən silahlı qruplaşmalar, xüsusilə SDQ və onun tərkibindəki PYD/YPG kimi strukturlar Türkiyə üçün birbaşa milli təhlükə mənbəyidir. Ankara hesab edir ki, bu qruplar PKK ilə əlaqəli olduqları üçün onların bölgədə mövcudluğu həm Suriyanın gələcəyini, həm də Türkiyənin sərhəd təhlükəsizliyini sarsıdır.
