BAKI, AzerVoice, Nailə Babazadə

Türkiyə Milli Müdafiə Nazirliyinin (MSB) mənbələri, ölkənin Qəzzada yaradılması planlaşdırılan beynəlxalq müşahidə qüvvəsində yer alıb-almayacağı ilə bağlı açıqlama yayıb. Nazirlik bildirib ki, Türkiyə Silahlı Qüvvələri (TSQ) sülhün bərqərar edilməsi və qorunması sahəsində böyük təcrübəyə malikdir və üzərinə düşəcək hər cür vəzifəni yerinə yetirməyə hazırdır.

AzerVoice xəbər verir ki, Prezident Rəcəb Tayyib Ərdoğanın HƏMAS ilə İsrail arasında əldə edilən atəşkəs razılaşmasının icrasına nəzarət edəcək beynəlxalq qüvvədə Türkiyənin də iştirak edəcəyini açıqlamasından sonra, Ankara hökumətinin bu prosesdəki rolu və mümkün töhfələri diqqət mərkəzinə çevrilib.

MSB-nin açıqlamasında qeyd olunub ki, Türk Silahlı Qüvvələri bu günə qədər dünyanın müxtəlif bölgələrində həyata keçirilən çoxsaylı beynəlxalq missiyalarda uğurla iştirak edib və sülhün qorunması sahəsində etibarlı tərəfdaş kimi tanınıb.

“Türk Silahlı Qüvvələri bu günə qədər beynəlxalq sülh və təhlükəsizliyin təmin olunması məqsədilə müxtəlif təşkilatlar tərəfindən həyata keçirilən çoxsaylı missiyalarda iştirak etmiş, peşəkarlığı və ədalətli mövqeyi ilə bütün tərəflərin etimadını qazanmışdır,” – açıqlamada qeyd olunub.

Qeyd edək ki, Türkiyə tərəfi atəşkəsin möhkəmləndirilməsi, bölgədə sabitliyin təmin olunması və humanitar vəziyyətin yaxşılaşdırılması istiqamətində beynəlxalq əməkdaşlığa açıq olduğunu dəfələrlə vurğulayıb.