BAKI, AzerVoice, Nailə Babazadə

İsrail Qərb Sahilini ilhaq etməyəcək, əks halda ABŞ-ın bütün dəstəyini itirəcək – Donald Tramp

AzerVoice xəbər verir ki,ABŞ Prezidenti Donald Tramp “Time” jurnalına verdiyi müsahibədə bildirib ki, İsrail Qərb Sahilini ilhaq etməyəcək, çünki bu baş verəcəyi təqdirdə ölkə bütün Amerika dəstəyindən məhrum olacaq.

Tramp qeyd edib ki, İrana edilən hücumdan sonra bu ölkə ciddi şəkildə zəifləyib və nəticədə Orta Şərq artıq əvvəlki kimi deyil.

O, hazırda İranın nüvə proqramı uğrunda deyil, mövcudluğunu qorumaq uğrunda mübarizə apardığını bildirib.

“Mən hesab edirəm ki, İran artıq sadəcə sağ qalmaq üçün mübarizə aparır, nüvə silahı üçün yox. Nüvə təhlükəsi artıq mövcud deyil. İran obyektlərinə edilən hücum isə mükəmməl idi,” – deyə Tramp vurğulayıb.

Qəzza məsələsinə toxunan Tramp, bölgəni ziyarət etməyi planlaşdırdığını, lakin dəqiq tarix müəyyən etmədiyini deyib.

O, İsrailin baş naziri Benyamin Netanyahuya İsrailin dünyanın hamısı ilə eyni anda müharibə apara bilməyəcəyini dediyini bildirib.

“Mən Netanyahunu dayandırdım. Dedim ki, İsrail kiçik ölkədir və bütün dünyaya qarşı vuruşa bilməz.”-deyə Tramp bildirib.

Tramp bir daha vurğulayıb ki, İsrailin Qərb Sahilini ilhaq etməsinə icazə verməyəcək.

“Bu baş verməyəcək, baş verməyəcək, baş verməyəcək... Mən ərəb ölkələrinə söz vermişəm ki, belə bir şey olmayacaq. Bizim böyük ərəb dəstəyimiz var və əgər İsrail Qərb Sahilini ilhaq etsə, ABŞ-ın bütün dəstəyini itirəcək.”

Tramp həmçinin qeyd edib ki, fələstinlilərin hazırda aydın lideri yoxdur, və Mahmud Abbasın Qəzzada gələcək hakimiyyətin bir hissəsi olma ehtimalı çox azdır.